ՀՅԴ Բիւրոյի ներկայացուցիչը «քարոզչական ճնշում է» համարում Սարգսեանի ուղերձը Գիւլին
09.02.2010
Ռուզաննա ՍտեփանեանՀայ Յեղափոխական Դաշնակցութեան բիւրոյի ներկայացուցիչ Հրանտ Մարգարեանի համոզմամբ՝ նախագահ Սերժ Սարգսեանի ուղերձը Աբդուլա Գիւլին Թուրքիայի վրայ գործադրւող քարոզչական ճնշում է ու, թերեւս, նաեւ զգուշացում՝ «համբերութիւնը հատելու վերաբերեալ»:
Երեքշաբթի օրը «Ազատութիւն» ռադիոկայանի հետ հարցազրոյցում նա ասաց, թէ Թուրքիան էլ իր հերթին է Հայաստանի վրայ ճնշում գործադրում, մասնաւորապէս, հիմնական խնդիրը Թուրքիայի համար այս պահին Ղարաբաղի հարցն է եւ Հայաստանի Սահմանադրական դատարանի որոշումը՝ որպէսզի Ազգային ժողովի կողմից արձանագրութիւնները վաւերացնելու ընթացքում այդ որոշումը վերապահում չդառնայ: Եւ քանի որ Թուրքիային «յաջողւում է այս առումով ճնշումներ բանեցնել», գործընթացի ձգձգումը, ըստ նրա, ի վնաս Հայաստանի է:Ուստի, Հրանտ Մարգարեանի համոզմամբ, Հայաստանը պէտք է ամենաուշը մարտին բանակցութիւնը ձախողւած համարի՝ Թուրքիայի մեղքով:
Ընդգծելով, որ արձանագրութիւնները Ազգային ժողովի կողմից պէտք է վերապահումով վաւերացւեն՝ Մարգարեանը միաժամանակ նշեց, որ իրենք այս առումով մտահոգութիւն ունեն, հետեւաբար պէտք է ամէն կերպ Ազգային ժողովին համոզեն, որ վերջինս հաւատարիմ մնայ Սահմանադրական դատարանի որդեգրած մօտեցումներին:
Հարկ է նշել, որ Դաշնակցութիւնը մինչեւ օրս չի բարձրացնում նախագահ Սերժ Սարգսեանի հրաժարականի հարցը, քանի որ յոյսեր ունի, թէ նախագահը կը փոխի իր մօտեցումը եւ չի վաւերացնի արձանագրութիւնները գոյութիւն ունեցող տեսքով:
Հարցին, թէ արդեօ՞ք իրենց յաջողւել է համոզել նախագահին արձանագրութիւնները վերապահումով վաւերացնելու հարցում, Մարգարեանը արձագանքեց. - «Մեր պայքարը պատճառ դարձաւ, որ Սահմանադրական դատարանը այդ որոշումը կայացնի: Եւ այդ որոշման կայացման մէջ անմասն չէ նախագահ Սերժ Սարգսեանը: Եւ դա ուրախացնող երեւոյթ է... Չեմ կարող ասել փոփոխութեան մասին: Ես կարծում եմ, որ արդար է եթէ ասենք, որ ինչ-որ կարծրացում կայ դիրքորոշումների առումով՝ թէ' Ղարաբաղի հարցում, թէ' Հայ-թրքական յարաբերութիւնների հարցում: Աւելի ազգային է դարձել, աւելի դէպի ճիշտն է դիրքորոշւել Սահմանադրական դատարանի որոշումով: Բայց դա կիսատ է, դա պէտք է կարողանալ մինչեւ վերջ տանել»:
Իսկ հարցին, թէ արձանագրութիւնների՝ առանց վերապահման վաւերացման դէպքում կը պահանջի՞ արդեօք Դաշնակցութիւնը Սերժ Սարգսեանի հրաժարականը, Հրանտ Մարգարեանը պատասխանեց, թէ անկախ այն բանից` կանի՞ թէ՞ չի անի Ազգային ժողովը վերապահում, իրենք այսօր գնում են իշխանափոխութեան, քանի Հայ-թրքական յարաբերութիւններն իրենց համար իշխանութիւնների դէմ պայքարի միակ պատճառը չեն:
«Սերժ Սարգսեանի հրաժարականը պահանջելու կամ չպահանջելու մէջ ոչ մի բովանդակութիւն գոյութիւն չունի: Բովանդակութիւնը գործն է: Եթէ մենք ընդդիմութիւն ենք, նշանակում է, որ ուզում ենք այս իշխանութիւնը փոխենք», - ասաց նա՝ շարունակելով. - «Մենք ընտրութիւնների միջոցով ենք փորձում իշխանափոխութեան հասնել՝ հերթական կամ ոչ հերթական: Բայց ընտրութիւններից դուրս ուրիշ բան է, որին մենք այսօր չենք ձգտում»:
Posts
0 Պատգամ:
Post a Comment