Հայ Յեղափոխական Դաշնակցութեան

120-ամեակի առիթով

ՀՀ Սփիւռքի նախարար Հրանուշ Յակոբեանի շնորհաւորական ուղերձը՝ ՀՅԴ

Բիւրոյի ներկայացուցիչ Հրանտ Մարգարեանին



Ջերմօրէն շնորհաւորում եմ Հայ Յեղափոխական Դաշնակցութեան 120-ամեայ յոբելեանը եւ սրտանց մաղթում նորանոր նւաճումներ՝ մեր ազգային իղձերի ու նպատակների իրականացման գործում:
Հայ Յեղափոխական Դաշնակցութիւնը կուսակցութիւն է, որի ծնունդը ժամանակի հրամայականն էր, պատմական անհրաժեշտութեան թելադրանքը: Կուսակցութիւնը ստեղծւեց, որպէսզի իր ողջ գործունէութիւնը անմնացորդ նւիրէր հայ ժողովրդի ազգային-ազատագրական պայքարին, անկախ պետութեան վերակերտմանը, աշխարհասփիւռ հայութեան ազգապահպանմանը եւ Հայ Դատի արդար լուծմանը:
Եւ արդէն 120 տարի նա հաւատարիմ է իր սուրբ ուխտին, իր պատմական առաքելութեանը: Հայ Յեղափոխական Դաշնակցութիւնը մշտապէս կանգնած է հայ ժողովրդի ազգային շահերի պաշտպանութեան դիրքերում: 1890 թ. ստեղծւելով Թբիլիսիում՝ կուսակցութիւնը նպատակ ունէր համախմբել ազգային-յեղափոխական ուժերը մէկ դաշինքի մէջ՝ դառնալով մեր ազատագրական պայքարի դրօշակակիրը:
Կուսակցութիւնը ձեւաւորւեց ամուր գաղափարական հիմքի վրայ, որդեգրեց ազգային արժէքներ, ինչն էլ ապահովեց նրա միասնականութիւնը, նւիրական աշխատանքը, յանուն հայութեան գործելու պատրաստակամութիւնը եւ երկարակեցութիւնը: Դաշնակցութիւնը 21-րդ դար է հասել՝ բազմապատկած իր կարողականութիւնն ու մարտունակութիւնը, գաղափարապէս կոփւած ու հզօրացած՝ միաւորելով խորագէտ, շրջահայեաց եւ հայրենասէր անհատների ուժերը:
14-րդ դարում հայկական պետականութեան անկումից եւ վեց հարիւրամեակ տեւած անիշխանութիւնից յետոյ միայն՝ 1918 թւականին, Հայ Յեղափոխական Դաշնակցութեան հմուտ ղեկավարութեամբ, հայ ժողովուրդը կրկին նւաճեց ազատ ու անկախ ապրելու իր իրաւունքը: 1920 թ. դեկտեմբերից Դաշնակցութիւնը դարձաւ վտարանդի կուսակցութիւն, սակայն չընկրկեց՝ ծառայելով տարագիր հայութեան կազմակերպմանն ու ազգապահպանմանը եւ Հայ Դատի պահանջատիրութեանը՝ դառնալով Հայոց Ցեղասպանութեան միջազգայնօրէն ճանաչման եւ դատապարտման գործի ամենաեռանդուն եւ ամենահետեւողական ուժերից մէկը՝ հաւատալով ճշմարտութեան յաղթանակին:
Կուսակցութիւնը Հայաստանի անկախութեան հռչակումից յետոյ վերահաստատւելով Հայրենիքում՝ կրկին ստանձնեց համահայկական կառոյցի ղեկավարման եւ համակարգման պատասխանատւութիւնը՝ անգնահատելի դերակատարութիւն ունենալով հայկական երկու հանրապետութիւնների ու Սփիւռքի կեանքում։ Եւ պատահական չէր, որ Դաշնակցութիւնը ինքնամոռաց՝ նետւեց Արցախի պաշտպանութեան գործին եւ հայ ժողովրդի հետ միասին՝ ըմբոշխնեց յաղթանակի բերկրանքը:
Հայ Յեղափոխական Դաշնակցութիւնը վաստակածի իրաւունքով վայելում է մեր ժողովրդի յարգանքն ու սէրը՝ հայոց պետութեան կայացման եւ զարգացման հայեցակարգային ուղենիշ համարելով հայութեան պատմա-քաղաքական, բարոյա-հոգեբանական, պատմա-մշակութային արժէքները: Սփիւռքահայերի համար նւիրական նպատակ է Ազատ, Անկախ եւ Միացեալ Հայաստանի կերտումը, ինչը մշտապէս եղել է Հայ Յեղափոխական Դաշնակցութեան հանգանակը: ՀՀ Սփիւռքի նախարարութիւնը, որ կեանքի է կոչւել Հայրենիք-Սփիւռք գործակցութեանը համակարգւած լուծումներ տալու, նոր կապեր եւ յարաբերութիւններ զարգացնելու նպատակով, իր գործունէութեան առաջին իսկ օրերից համագործակցում է ՀՅԴ-ի կառոյցների հետ:
Մենք լիայոյս ենք, որ առաջիկայում եւս մեր համագործակցութիւնն աւելի խորանայ եւ ընդլայնւի՝ ի շահ մեր աշխարհասփիւռ ժողովրդի, ի շահ մեր երազների իրականացման: Կրկին շնորհաւորում եմ Հայ Յեղափոխական Դաշնակցութեան 120-ամեայ յոբելեանը եւ մաղթում, որ կուսակցութիւնը երրորդ հազարամեակում նոյն ոգով շարունակի իր աննկուն պայքարը՝ ընդդէմ համահարթեցման ու համընդգրկման համաշխարհային միտումների եւ մարտահրաւէրների, միշտ անվեհեր ու աննահանջ գործի՝ հայ ոգու, հայ տեսակի ու որակների, յանուն ազգային արժէքների պահպանութեան, յանուն հզօր եւ զարգացած Հայաստանի:
Վստահ եմ, որ փառապանծ ուղի անցած կուսակցութիւնն ունենալու է նորանոր յաջողութիւններ՝ շնորհիւ իր հաւաքական կամքի, վճռականութեան եւ հայրենանւէր գործունէութեան:

«ԱԼԻՔ»

0 Պատգամ: