Հ.Յ.Դ. - 120 ԱՄԵԱԿ

ՀՅԴ Բիւրոյի ներկայացուցիչ

Հրանտ Մարգարեանի ելոյթը՝ Արցախում

«Այսօր Արցախն է Հայաստանի

ու հայութեան կենտրոնը»



Արցախի մայրաքաղաք Ստեփանակերտում դեկտեմբերի 24-ին նշւեց Հ. Յ. Դաշնակցութեան հիմնադրութեան 120-ամեակը: Ձեռնարկին ներկայ էին՝ Լեռնային Ղարաբաղի իշխանութիւնները՝ նախագահ Բակօ Սահակեանի գլխաւորութեամբ, Արցախի քաղաքական կուսակցութիւնների, հասարակական կազմակերպութիւնների եւ զանգւածային լրատւամիջոցների ներկայացուցիչներ:
Արտայայտւեց Արցախի թեմի առաջնորդ Պարգեւ արք. Մարտիրոսեանը, որը նշեց, թէ Դաշնակցութիւնը սկզբունքային կուսակցութիւն է եւ միշտ համարձակօրէն յայտնել է իր կարծիքը՝ լինելով թէ՛ դիմադիր, թէ՛ ընդդիմադիր, թէ՛ կոալիցիոն ուժ: Անդրադառնալով երկու հայկական հանրապետութիւնների զարգացման գործում Դաշնակցութեան դերին՝ Սրբազան Հայրը շեշտեց, որ ՀՅԴ-ն տարբերւում է իր ազգային նկարագրով եւ Հայրենիքի ու նրանից դուրս ուշադրութիւն է գրաւում հայապահպանման գործով: Ելոյթներով հանդէս եկան՝ ՀՅԴ Բիւրոյի ներկայացուցիչ Հրանտ Մարգարեանը եւ ՀՅԴ Արցախի Կենտրոնական կոմիտէի ներկայացուցիչ Դաւիթ Իշխանեանը: Ստորեւ՝ այդ ելոյթները:
Թւում էր՝ ՀՅԴ-ի 120-ամեակի առիթով Լիբանանում արտասանած խօսքս եզրափակիչն է լինելու: Սակայն, երէկ անդրադարձայ, որ Արցախում կազմակերպած տօնակատարութիւնը այլ կարեւորութիւն ու իմաստ ունի: Պարտաւորւած էի ներկայ գտնւել եւ խօսք ասել: 120 տարիների վերջին 20-ամեակը սկսել ենք Արցախով: Արցախի ազատագրական պայքարով է մեր կազմակերպութիւնը վերընձիւղւել Հայրենիքում:
Մենք Արցախով ու Արցախի ազատագրական պայքարով ենք սկսել մեր գործունէութեան նոր շրջանը եւ նւիրւել ենք անմնացորդ: Հարիւրաւոր զոհեր ենք տւել այս պայքարում, տւել ենք մեր կարողութեան առիւծի բաժինը: Մենք Արցախով հայրենի իրականութեան մէջ ազգային ուղղութիւն ենք ստեղծել, առանցք ձեւաւորել:Ուզում եմ յիշել Արցախեան պայքարում նահատակւած մեր ընկերներին: Բոլորին անուն առ անուն թւարկել, հնարաւոր չէ, բայց մի քանիսին յիշենք որպէս ներկայացուցիչներ:
Արցախցի Աշոտ Բեկոր, արեգցի Թաթուլ Կրպէեան, երեւանցի Արթուր Ղարիբեան, տողեցի Վիգէն Գրիգորեան, լիբանանահայ Մհեր Ջուլհաջեան, արցախցի Արթուր Մկրտչեան, հրազդանցի Աբօ Ալավերդեան, շահումեանցի Շահէն Մեղրեան, իրանահայ Բագրատ Սահակեան, պռօշեանցի Պետօ Ղեւոնդեան: Փառք ու պատիւ բոլորին:Մենք առաջին իսկ օրից սկսած՝ մերւեցինք Արցախին, մեր կարեւոր ներդրումն ունեցանք Արցախի ինքնակազմակերպման հարցում: -Արցախի ազատագրական պայքարի կազմակերպում-Արցախի անկախ պետականութեան կերտում -Մասնակցութիւն պետականաշինութեան գործում:
Վերջապէս, այսօր էլ Արցախը շարունակում է մնալ մեր գերխնդիրը եւ լինելու է այդպիսին, մինչեւ աշխարհն ընդունի փաստը, հաշւի նստի կայացած իրականութեան հետ, ճանաչի Լեռնային Ղարաբաղի կայացած Հանրապետութիւնը:Մենք Արցախի հետ կիսել ենք մեր նոյնացւած ճակատագիրը: Մենք Արցախի հետ սկսել ու շարունակում ենք պայքարը: Հայկական իրականութիւնում Դաշնակցութիւնն ու Արցախի գործօնն ունեցել են չարձանագրւած, չպայմանաւորւած, չյայտարարւած համագործակցութիւն, դաշինք, ու մեծ է եղել մեր գործակցութեան արդիւնքը: Մեծ է եղել ու կարող է դեռ մեծ դերակատարութիւն ունենալ: Վերջապէս, իրողութիւն է՝ հայկական իրականութիւնը բաժանւում է ջրբաժանով, որն անցնում է Արցախի հարցի միջով:
Մի կողմում նրանք են, որոնց համար Արցախի կեանքը հարց ու գերխնդիր է, միւս կողմում նրանք, որոնց համար Արցախի հարցը կարեւոր չէ եւ ոչ էլ՝ գերխնդիր: Որպէս կազմակերպւած ուժ՝ Արցախի հարցը մեզ համար գերխնդիր է, մեզ հետ են նաեւ մեր ժողովրդի առողջ ազգային տարրերը, մտաւորականութիւնը, պարզ հայ գիւղացին, աշխատաւորն ու ազգային արժանապատւութիւն ունեցող հայորդիները:Այս չարձանագրւած, չյայտարարւած համագործակցութիւնը՝ Արցախեան գործօնի ու Դաշնակցութեան, պէտք է լինի այն առանցքը, որի շուրջ կը կայանայ ազգային միասնականութիւնը:
Միասնականութիւն, որը ծնունդ կը տայ ազգային, համահայկական անպարտելի ուժի ձեւաւորման:Միասնականութիւն, որը պէտք է ապահովի բովանդակ ազգի մէկութիւնը:Միասնականութիւն, որը թոյլ չի տալու պառակտւել, տարբեր կողմերից թեքւել կամ ջարդւել:Միասնականութիւն, որ չհաւատանք սրա ու նրա խոստումներին, չվախենանք նրանց սպառնալիքներից: Միասնականութիւն, որ չտրւենք հեշտ ու կարճ ճանապարհներով գնալու գայթակղութեանը: Որ այն, ինչ ապահովել ենք արեամբ ու պատերազմով, տանուլ չտանք բանակցութիւնների սեղանի շուրջ:
Միասնականութիւն, որ մեզ համար, Հայաստանի Հանրապետութեան համար յաղթանակ կապահովի, վերջնական յաղթանակ, որ այլեւս որպէս ժողովուրդ՝ դադարենք լացող, կոտրւած ազգ լինել, դադարենք յոխորտացող ու երազող մարդկանց հաւաքականութիւն լինել: Դառնանք իրապէս յաղթող, ապրող, զարգացող ազգ:
Յաղթանակների սկիզբ դնենք մեր ժողովրդի համար:Աւարտեմ խօսքս՝ նշելով Արցախի համար կարեւոր մի քանի առաջնահերթութիւն:
1- Որ ԼՂՀ-ն լինի կենսունակ, զարգացող, հզօր, գրաւիչ երկիր՝ անհրաժեշտ է երկրում ապահովել սոցիալական արդարութիւն, ժողովրդավարութիւն:
2- ԼՂՀ-ն պէտք է ունենայ ակտիւ, ինքնուրոյն, նախաձեռնող, ներազգային մշտական ներկայութիւն ու արտաքին քաղաքական գործունէութիւն:
3- Միջազգային ուժերը ազատագրւած տարածքները, բռնագրաււած Շահումեանն ու Գետաշէնը հայկական կամ ադրբեջանական տեսնելու ոչ մի շահագրգռութիւն չունեն: Խնդիրը մեր մէջ է, թէ մենք ինչքանով ենք պատրաստ այդ ամբողջը որպէս սեփական հայրենիք ներկայացնել եւ պաշտպանել:
4- Արցախը չպէտք է մենակ մնայ: Արցախի անվտանգութեան, յաջողութեան համար պէտք է շարունակի երաշխաւոր լինել Հայաստանի Հանրապետութիւնը: Արցախը պէտք է շահագրգռւած լինի, որ Հայաստանը դառնայ արդար, ազատ երկիր: Քաղաքականապէս կայուն Հայաստանի Հանրապետութեան երաշխիքը ներազգային կեանքում արդարութեան ու ժողովրդավարութեան հաստատումն է:
5- Արցախը հզօր է: Արցախցիների տունդարձի ժամանակն է: Արցախցիները ոչ մի տեղ չեն կարող այնքան օգտակար լինել Արցախին, որքան հէնց Արցախում: Դէպի տուն՝ Արցախ, վերադարձի ժամանակն է: Այսօր Արցախն է Հայաստանի ու հայութեան կենտրոնը: Այսօր Արցախից է բխում մեր ուժի ու լինելիութեան աղբիւրը: Այսօր եւ միշտ 120-ամեայ երիտասարդ Հ. Յ. Դաշնակցութիւնը Արցախի կողքին է:

«ԱԼԻՔ»

0 Պատգամ: