Հովւական երկօրեայ այցելութիւն՝

Շիրազի հայ համայնքին


ՀԱՆՐԱՅԻՆ ԿԱՊԻ ԳՐԱՍԵՆԵԱԿ, ԱԶԳԱՅԻՆ ԱՌԱՋՆՈՐԴԱՐԱՆ, ՆՈՐ ՋՈՒՂԱ
2010 թւականի դեկտեմբերի 9-ին Սպահանի հայոց թեմի առաջնորդ Տ. Բաբգէն եպս. Չարեանը, այցելեց շիրազահայ համայնքին։ Նրան ընկերակցում էին թեմի Կրօնական խորհրդի ատենապետ Վարուժ Մովսիսեանը եւ Թեմական խորհրդի անդամներ՝ Գառնիկ Բաղդասարեանն ու Վարուժ Մինասեանը։Շիրազի համայնքի զաւակները մեծ ուրախութեամբ եւ խանդավառութեամբ դիմաւորեցին պատւիրակութեանը։
Առաջնորդ Սրբազան Հայրը եւ ազգային մարմինների ներկայացուցիչները հանդիպում ունեցան համայնքի Եկեղեցեաց վարչութեան, Տիկնանց յանձնախմբի եւ Հ.Մ.Ա.Կ.-ի պատասխանատուների հետ, որտեղ խօսւեցին համայնքին յուզող հարցերի վերաբերեալ եւ տեղեկութիւններ փոխանցւեցին համայնքի գործունէութեանց մասին։Հանդիպման աւարտին «Հայ տուն» կենտրոնի սրահում տեղի ունեցաւ Հայ կնոջ տարւայ առթիւ հանդիսութիւն։
Եկեղեցեաց վարչութեան ատենապետ Էդիկ Տէր-Եղիշեանը բացման խօսքն ասաց եւ Սրբազան Հօրը հրաւիրեց՝ օրւայ խորհրդի մասին բանախօսելու։Առաջնորդ Սրբազան Հայրն իր խօսքում անդրադարձաւ հայ կնոջ անցեալում, ներկայում եւ ապագայում ունեցած եւ ունենալիք դերակատարութեանը, հայ կնոջ կարեւորութեանը՝ հայ ընտանիքում, որպէս կին ու մայր, եւ գործիչ՝ հասարակական կեանքում։
Բանախօսութիւնից յետոյ՝ համայնքի զաւակներից կազմւած մի խումբ ներկայացրեց գեղարւեստական ծրագիր՝ երգ ու ասմունք, եւ ներկաներին հրամցրեց ուրախ ու ոգեւորիչ պահեր։Հանդիսութեան աւարտին տեղի ունեցաւ հաւաքական ընթրիք եւ արտայայտւեցին սրտի խօսքեր ու բարեմաղթանքներ, նաեւ կատարւեցին երգեր՝ համայնքի զաւակների կողմից։
Յաջորդ առաւօտեան Շիրազի «Հայ տուն» կենտրոն այցելեցին Նոր Ջուղայի Հայ հոգեւոր կանանց լսարանի եւ «Շուշանիկ» երգչախմբի անդամուհիները՝ գլխաւորութեամբ Տ. Վազգէն քհնյ. Քեօշկերեանի։ Նոյն օրը առաջնորդ Սրբազան Հօր նախագահութեամբ Շիրազի Ս. Աստւածածին եկեղեցում մատուցւեց սուրբ եւ անմահ պատարագ։ Պատարագը մատուցեց Տ. Վազգէն քհնյ. Քեօշկերեանը, երգեցողութիւնը կատարեց «Շուշանիկ» երգչախումբը։ Յընթացս ս. պատարագի՝ առաջնորդ Սրբազան Հայրը քարոզեց հաւատքի եւ սիրոյ մասին եւ կրկին անգամ քրիստոնէական ջերմ սիրով ողջունեց Շիրազի հայ համայնքին ու Նոր Ջուղայից այցելած ներկաներին։
Ապա «Հայ տուն» կենտրոնի սրահում տեղի ունեցաւ հաւաքական սիրոյ ճաշ՝ մասնակցութեամբ առաջնորդ Սրբազան Հօր, Նոր Ջուղայի եւ Շիրազի ազգային մարմինների ներկայացուցիչների, համայնքի զաւակների, Նոր Ջուղայից այցելած հիւրերի։ Ճաշի ընթացքում օրւայ սեղանավարութիւնը կատարեց Տ. Վազգէն քհնյ. Քեօշկերեանը, կատարւեցին բարեմաղթութիւններ եւ հնչեցին երգեր ու սրտի խօսքեր՝ Շիրազի համայնքի եւ Նոր Ջուղայի զաւակների կողմից. մթնոլորտը խանդավառ էր եւ ուրախ։
Ճաշի աւարտին արտայայտւեց առաջնորդ Սրբազան Հայրը՝ գնահատելով համայնքի ազգային իշխանութեանը եւ զաւակներին՝ իրենց կապւածութեան եւ կազմակերպւածութեան համար, որտեղ մի փոքր համայնք լինելով հանդերձ՝ ունեն մեծ գործունէութիւն՝ ի խնդիր հայապահպանման եւ քրիստոնէական ոգու հզօրացման։ Հրաժեշտ առնելով՝ պատւիրակութիւնը առաջնորդ Սրբազան Հօր գլխաւորութեամբ Նոր Ջուղա վերադարձաւ՝ իր հետ բերելով քաղցր յուշեր։

«ԱԼԻՔ»

0 Պատգամ: