ԲՈՂՈՔԻ ՑՈՅՑ «ՔԱՍՓԻԱՆ» ԸՆԿԵՐՈՒԹԵԱՆ
ԳՐԱՍԵՆԵԱԿԻ ԱՌՋԵՒ՝ ԹԵՀՐԱՆՈՒՄ
ՍՏՈՐԱԳՐՒԵՑ ՈՒ ՀԱՍՏԱՏՒԵՑ 14 ԿԷՏԵՐԻՑ ԲԱՂԿԱՑԱԾ՝ ԲԱՆԱՁԵՒ – ՀԱՄԱԽՕՍԱԿԱՆ, ՈՐԸ ՊԻՏԻ ՅԱՆՁՆՒԻ ՊԵՏԱԿԱՆ ՊԱՏԱՍԽԱՆԱՏՈՒՆԵՐԻՆ
Այսօր կէսօրին, ժամը 11.33 –ին Թեհրան – Երեւան տխուր չւերթի զոհերի ընտանիքները եւ մի խումբ թեհրանահայեր համախմբւելով չւերթը իրականացնող «Քասփիան» ընկերութեան գրասենեակի առջեւ, բողոքեցին վթարի պատճառները չյայտարարւելու եւ այս թւով զոհերի նկատմամբ կիրառած անտարբերութեան քաղաքականութեան դէմ։
Թէեւ ընկերութեան պատասխանատուները անգամներ ցուցարարներին շէնքի ներսը հրաւիրեցին բացատրութիւններ տալու համար, սակայն նրանք չընդունելով, պահանջեցին իրենք՝ պատասխանատուները դուրս գան եւ բացատրութիւններ տան բողոքող հանրութեանը։
Ներկաները առանձին արտայայտութիւններով ակնարկեցին մի շարք թերութիւնների, որոնք մինչեւ օրս դրանց համար բացատրութիւններ չեն տրւել։
Ներկաները, որոնք իրենց հետ կրում էին զոհերի անհատական եւ համախմբւած լուսանկարները, ժողովրդից ուզեցին որ բոյկոտի ենթարկեն թէ՛ «Քասփիան» ընկերութիւնը, եւ թէ՛ «Թոփոլոֆ» տեսակի օդանաւները։
Այդ ընթացքում, զոհերից մէկի հարազատը միւս զոհերի կողմից ընթերցեց 14 կէտերից բաղկացած մի բողոքի բանաձեւ, որը հաստատւեց ներկաների կողմից։
Վերջում նոյն բանաձեւը որպէս համախօսական ստորագրւեց ներկաների կողմից ու յանձնւեց պատասխանատուներին։
Նոյնը պիտի յանձնւի նաեւ պետական միւս պատասխանատուներին։
Նշելի է, որ օդանաւային այդ ընկերութիւնը փորձեց նոյն օդանաւի տեխնիկական մասնագէտ՝ Գրիգոր Յովհաննիսեանի միջոցով պարզաբանումներ կատարեն դէպքի մասին, սակայն ցուցարարները խուսափեցին լսել նրան։
Ցոյցը կազմակերպւել էր ինքնակոչ կերպով՝ զոհերի հարազատների կողմից ու ընթացաւ խաղաղ կերպով։
Մանրամասնութիւնները՝ քիչ անց։
Posts
0 Պատգամ:
Post a Comment