Բելգիայի խորհրդարանի անդամ. -

Հայոց Ցեղասպանութեան միջազգային

ճանաչումը էական առաջընթաց է ունեցել


«Համոզւած եմ, որ գալու է մի օր, երբ Թուրքիան կճանաչի Հայոց Ցեղասպանութիւնը»



Դեկտեմբեր 26, 2010 02:07
Բելգիայի Թագաւորութեան Սենատի պատւաւոր անդամ Ֆրանսուա Ռոլեան դիւ Վիվյեի գնահատմամբ, անցած 15 տարիներին Հայոց Ցեղասպանութեան միջազգային ճանաչումը էական առաջընթաց է ունեցել:
«Իհարկէ, ճանաչումը համաշխարհային չէ, սակայն դուք պէտք է նայէք, թէ ինչ է արւել վերջին 10-15 տարում: Առաջընթացը նշանակալից է», -ասել է նա «Ազատութիւն» ռադիոկայանի հետ զրոյցում եւ յաւելել. «Իհարկէ, կարեւոր է արեւմտա–եւրոպական երկրների եւ, յոյսով եմ, մի օր էլ ԱՄՆ կողմից Հայոց Ցեղասպանութեան ճանաչումը։ Սակայն առաւել կարեւոր է Հայաստանի հարեւանի` Թուրքիայի, կողմից ճանաչումը: Սա է ապագայի հիմնական հարցը, բայց այս առումով ես որոշակի յոյսեր ունեմ: Որովհետեւ, օրինակ, իմ երկրում` Բելգիայում, մենք արդէն ունենք այնտեղ ծնւած թուրքերի երրորդ սերունդ: Այդ` երրորդ սերունդը գնում է համալսարաններ, ձեռք է բերում քննադատող մտածելակերպ, եւ համալսարաններում նրանք սովորում են այն պատմութիւնը, որը նրանց հայրերը նրանց չեն պատմել: Կարծում եմ, որ սա մեծ յոյս է ապագայի համար»:
Խօսելով այն մասին, թէ իր կարծիքով ինչ ընթացք կստանայ միջազգային հանրութեան ու Թուրքիայի կողմից Հայոց Ցեղասպանութեան փաստի ճանաչումը` դյո Վիվյեն, մասնաւորապէս, նշել է. «Ես այն սերնդից եմ, ով մտածում էր, թէ Բեռլինի պատը երբէք չի փլւի, եւ յանկարծ այն քանդւեց, որովհետեւ դրան նախորդող 20-30 տարում որոշակի աշխատանք էր տարւում ինտելեկտուալների ցանցի միջոցով, ու ի վերջոյ արդիւնքը ստացւեց։ Սա ճիշտ այն է, ինչ ես մտածում եմ Հայոց Ցեղասպանութեան ճանաչման առումով: Համոզւած եմ, որ գալու է մի օր, երբ Թուրքիան կճանաչի Հայոց Ցեղասպանութիւնը»:
«Ես ձեզ կարող եմ պատմել, թե ինչ խօսակցութիւն տեղի ունեցաւ իմ եւ Աբդուլլահ Գիւլի միջեւ, երբ նա դեռ Թուրքիայի արտգործնախարարն էր: Նա դժգոհ էր այն փաստից, որ Հայոց Ցեղասպանութեան վերաբերեալ որեւէ քննարկում չկայ Հայ ու թուրք պատմաբանների միջեւ, եւ ասում էր, թէ դա լաւ գաղափար կլինէր», - յիշել է Բելգիայի Թագաւորութեան Սենատի պատւաւոր անդամը՝ շարունակելով. «Ես նրան ասացի, պարո՛ն նախարար, տեսէք` դուք խօսում էք պատմաբանների յանձնաժողով ստեղծելու մասին մի երկրի հետ, որին դուք նոյնիսկ չէք էլ ճանաչել: Արդեօք դուք չէ՞ք կարծում, որ այդ ուղղութեամբ առաջին քայլը պէտք է լինի սահմանների բացումը, դեսպանների փոխանակումը եւ յետոյ նոր սկսէք քննարկումները: Եւ այդ ժամանակ պարոն Գիւլն ասաց` այո, ձեր ասածի մէջ տրամաբանութիւն կայ»: Հաղորդում է «Ազատութիւնը»:

Լուրեր Հայաստանից - NEWS.am

0 Պատգամ: