Թուրքիայում անօրինական ապրող հայերի երեխաները կրթութեան իրաւունք կունենա՞ն
12:56 / 02.04.2010
Թուրքիայում շարունակւում են յայտարարութիւնները անօրինական ապրող հայաստանցիների կրթութեան վերաբերեալ:
Յայտնի է, որ այդ հարցով դեռեւս նոյեմբերին Թուրքիայի վարչապետ Ռեջեփ Թայիփ Էրդողանին էր դիմել Պոլսոյ Հայոց Պատրիարքարանի Հոգեւոր խորհրդի առաջնորդ արք. Արամ Աթեշեանը: Այնուհետ այս հարցը արք. Աթեշեանը քննարկել էր Թուրքիայի փոխվարչապետ Բիւլենթ Առընչի հետ, ով յայտարարել էր, որ իր համար հայ երեխաների կրթութեան հարցը նախ եւ առաջ մարդկային խնդիր է: Լոնդոնում արած անյաջող յայտարարութիւնից յետոյ Էրդողանը նոյնպէս խօսել է տւեալ խնդրով` նշելով, որ համապատասխան հրահանգներ է տւել ազգային կրթութեան նախարարին:
Ազգային կրթութեան նախարար Նիմեթ Չուբուքչուն թրքական խորհրդարանում մասնակցել է թուրք-գերմանական համալսարանի ստեղծման քննարկումներին, որի ընթացքում պատասխանել է պատգամաւորների հարցերին: Հարցեր են եղել նաեւ Թուրքիայում անօրինական ապրող հայաստանցի երեխաների կրթութիւն ստանալու իրաւունքի վերաբերեալ, որին ի պատասխան նախարարը նշել է. «Նախ անհրաժեշտ է երկրում անօրինական գտնւող հայերին որոշակի կարգավիճակ տալ: Ներկայումս մենք աշխատում ենք հայերի եւ այլ ազգերի ներկայացուցիչների, ում կարգավիճակը եւս Թուրքիայում ճանաչւած չէ, երեխաների կրթութեան իրաւունքը ապահովելու վրայ: Նախագծի քննակումները ընթանում են 3 կէտի շրջանակներում»,- նշել է կրթութեան նախարարը եւ յիշեցրել, որ Ստամբուլի հայկական դպրոցների համար արդէն կը լինեն հայերէն դասագրքեր, որոնք ինչպէս թրքական դպրոցներում, Հայ աշակերտներին կբաժանւեն անվճար:
Posts
0 Պատգամ:
Post a Comment