ՏՐԱՄԱԳԻԾ

Նախեւառաջ շնորհակալութիւններս եմ ցանկանում յայտնել «Ալիք» օրաթերթի յարգարժան խմբագրակազմին, որ այսպիսի հնարաւորութիւն է ստեղծել, որպէսզի «Թունեան» դպրոցի հար-ցը բաւականին լուրջ ձեւով քննարկւի եւ տպագրւի «Ալիք»-ում. ես հետեւում եմ, ինչպէս նաեւ լուրջ հետեւողականութեամբ նաեւ ծնողները, քանի որ դա փաստում է, որ հետեւողականութիւն կայ եւ բոլոր աշխատանքներն ընթացքի մէջ են:

Այժմ հակիրճ բացատրութիւններ տամ մեր դպրոցի ծնողների կողմից հաւաքւած ստորագրութեան-նամակի վերաբերեալ, որն ուղղւել էր Թեմական խորհրդին եւ Պատգամաւորական ժողովին ու նաեւ պատճէնը՝ Կրթական խորհրդին: Նամակի բովանդակութիւնը իրենից հետեւեալն էր ներկայացնում՝ ծնողները ցանկանում էին Թեմական խորհրդի, Պատգամաւորական ժողովի եւ Կրթական խորհրդի ներկայացուցիչների հետ Սասուն քաղաքամասում իրենց խնդիրները, հարցերը որոնք առաջ են եկել դպրոցի հետ կապւած, տեղում արծարծւէին եւ պատասխաններ ստանային եւ լսէին նրանցից անձամբ, որ արդեօք «Թունեան»-ի շէնքը ե՞րբ է պատրաստ լինելու, երեխաները ե՞րբ պիտի տեղափոխւեն նոր շէնք:

Եւ, բարեբախտաբար, հանդիպումը կայացաւ եւ ամէն ինչ շատ նորմալ ընթացք ունեցաւ, ցանկանում եմ անպայմանօրէն շեշտել, որ ժողովուրդը շատ գոհ մնաց այդ հանդիպումից եւ ամէն ինչ շատ բնականոն ընթացք ունեցաւ:

Հանդիպման ձեւաչափը այսպիսին էր՝ հրաւիրել էինք «Թունեան» տարրական դպրոցի եւ «Սասուն» մանկապարտէզի ծնողներին, քանի որ «Սասուն» մանկապարտէզն էլ պէտք է տեղափոխւի այդ նորակառոյց, ուրեմն՝ բնականաբար, մեծամասնութիւնը ներկաների «Սասուն» մանկապարտէզի եւ «Թունեան» տարրականի ծնողներն էին, ինչո՞ւ եմ հաստատ նշում՝ մեծամասամբ, քանի որ դռան մուտքի մօտ արձանագրել ենք, թէ ովքեր են ծնող, իսկ ինչու չէ ներկաներից մօտաւորապէս թւով 10 հոգի ծնողներ չէին, ուղղակի թաղեցիներ էին, որոնք, բնականաբար, հարցը թաղային բնոյթի դիտելով՝ իրենց ցանկութեամբ ներկայ էին այդ օրը, բայց մէկ անգամ էլ եմ շեշտում՝ մեծամասնութիւնը դահլիճում ծնողներն էին:

Հիմնականում այս ժողովը կայացաւ նամակը ուղղելուց յետոյ, ծնողները հարցեր ուղղեցին Թեմական խորհրդին, Թեմական խորհրդի պատասխանատուները բաւականին մանրամասն բացատրութիւններ տւեցին եւ ես շատ վստահ եմ, որ ժողովուրդը գոհ եւ բաւարարւած էր այս ամենից եւ ամենակարեւորը՝ դա պատիւ է, որ բերում է մեր ազգային իշխանութեանը, որ իսկապէս ազգային իշխանութիւնը հետամուտ է բոլոր աշխատանքներին՝ «Թունեան»-ի հարցով կամ ընդհանրապէս համայնքին վերաբերող հարցերին եւ ես ծնողների տեսակէտը ժողովից յետոյ նաեւ իմանալով, որոնք մօտենում եւ շնորհակալութիւն էին յայտնում յատկապէս ազգային իշխանութիւններից, որոնք եկան եւ լսեցին մեզ:

Ես զգում եմ, որ ժողովուրդը բաւականին արժեւորւած է զգում իրեն, եւ իհարկէ նշեմ, որ աշխատանքները ընթացքի մէջ են, քանի որ Պատգամաւորական ժողովում նաեւ պատիւ ունեմ ներկայ լինելու որպէս դիւանի անդամ, ցանկանում եմ յատկապէս շեշտել, որ մեր վերջին՝ 16-րդ նիստում, որը կայացաւ մի-երկու օր առաջ, այնտեղ յստակ որոշում տրւեց՝ Պատգամաւորական ժողովը խնդրեց Թեմական խորհրդին, որ շուտափոյթ կերպով քննարկւի, որ արդեօք հնարաւո՞ր է «Թունեան» տարրական դպրոցի երեխաներին տեղափոխել մի ուրիշ յարմար վայր, քանի որ մեր դպրոցը որոշւած էր կառուցել մինչեւ մէկ տարի, բայց, դժբախտաբար, բոլորս էլ գիտենք նման աշխատանքներում պատահում են շատ անսպասելի խնդիրներ, որոնք պատճառ են դառնում՝ ծրագրւած աշխատանքները յետաձգւեն եւ թերեւս այս դէպքում Թեմական խորհրդի ջանքերով խնդիրները հարթւել են եւ մենք արդէն մէկ տարի եղել ենք այս անյարմար շէնքում եւ արդէն երկրորդ տարեշրջանն ենք թեւակոխում, 2009-2010 թթ. նկատի ունեմ եւ ըստ Թեմական խորհրդի՝ դեռ 2010-11-ն էլ մենք լինելու ենք այս վայրում:

Մեր ծնողների մտահոգութիւնը, ընդհանրապէս, ոչ թէ նոր շէնքի կառուցումն է, այլեւ՝ երեխաների ներկայ իրավի ճակն է դպրոցում: Հիմնականում, այս ուղղութեամբ որոշում կայացւեց, որ Թեմական խորհուրդը շտապ կերպով ուսումնասիրութիւններ կատարի եւ եթէ հնարաւոր է, նաեւ Կրթական խորհրդի հետ միատեղ քննարկումներ կատարւեն եւ եթէ հնարաւոր լինի, աշակերտութեանը ժամանակաւորապէս տեղափոխեն մէկ ուրիշ աւելի յարմարաւէտ վայր՝ մինչեւ «Թունեան»-ի նոր շէնքը կառուցւի: Եւ ես շատ վստահ եմ, որ այս աշխատանքը հէնց այդպէս էլ հանգուցալուծում կը գտնի եւ վստահ եմ, որ աշխատանքները այսուհետ դրական ընթացք կունենան:
Կալւածագրերի հետ կապւած հարցը ամբողջացնելու համար՝ դիմեցինք Շինարարական մարմնի հետ Թ. Հ. Թեմական խորհրդի կապ Ռուբիկ Սարխոշեանին: Անդրադառնալով մեր հարցին՝ նա պատասխանեց.

«Ճիշտն ասած՝ այդ կալւածագրերի հարցը անցեալ շրջանի Թեմական խորհրդից է մեզ փոխանցւել, եւ գիտէք, որ տարբեր հողամասերից է այդ տարածքը բաղկացած, ընդհանուր մի տարածք՝ 2300-ից 400 մետր է, եթէ չեմ սխալւում, եւ երբ դիմել են քաղաքապետարան, որպէսզի ստանան շինարարութեան արտօնագիրը, պարզւել է, որ այդ կալւածագրերից մէկը չկայ:

Մինչ հարցը հարթւել է՝ շուրջ երկու ամիս տեւել է, քանի որ դիմել են տարբեր տեղեր, մինչեւ որ կարողացել են այս հարցը ներկայացնել եւ պատասխաններ ստանալ ու մի փոքր գործը յետաձգւել է՝ մինչեւ կարողացել են նախագծի հրահանգը ստանալ:

Դրանից յետոյ նախկինում արդէն յայտամրցոյթի փուլը անցել էր եւ գրեթէ այդ քարտէզների նախագիծը պատրաստւել էր՝ տարբեր ճարտարապետների կողմից, եւ առաջին երեք ճարտարապետները ճշտւած էին, թէ ովքեր պէտք է լինեն մրցութեանը: Այս շրջանի Թեմական խորհուրդը նախքան այն որ իր աշխատանքները կը սկսէր՝ մօտաւորապէս անցեալ շրջանի Թեմական խորհրդի գործունէութեան վերջերը յանձնախումբ կեանքի կոչեց, որը պէտք է զբաղւէր քարտէզների պատրաստման աշխատանքով, որովհետեւ մրցութեան փուլը թեւակոխել էին եւ գիտէին, թէ այդ ընտրւած երեք ճարտարապետներից ով պէտք է լինի:

Ես նոյնպէս ներառւած էի այդ յանձնախմբի մէջ, աշխատանքները սկսւեցին, (ուղղակի «Թունեան»-ի շինարարական աշխատանքներին հետամուտ լինելու յանձնախումբ է այս յանձնախումբը) եւ մենք ուսումնասիրեցինք հարցը եւ հրաւիրեցինք առաջին մրցանակ շահողին՝ Արա Ղահրամանեանին, նրան հրաւիրեցինք, խօսեցինք, ծանօթացանք նրա պայմաններին եւ ըստ դրա առաջնորդւեցինք:

Այսինքն՝ նրա ներկայացրած պայմանները ուսումնասիրելուց յետոյ՝ նրա հետ պայմանագիր ստորագրեցինք, որը երկու մասից էր բաղկացած, այսինքն՝ այդ քարտէզները, որ պէտք է պատրաստւէին, ունէին աշխատանքների առաջին եւ երկրորդ փուլ. առաջին փուլը ընդհանրութիւններն է ուսումնասիրում եւ երկրորդում արդէն ճարտարագիտական մանրամասնութիւններն են. այստեղ արդէն քարտէզները մանրամասնօրէն պատրաստւում եւ ներկայացւում են:

Այժմ մենք այդ առաջին փուլը անցնելուց յետոյ՝ մի շարք զեկոյցներ պատրաստել եւ յանձնել ենք Դպրոցների վերակառուցման եւ բարեկարգման կազմակերպութեանը, նրանց հաստատումն էլ ստացւել է: Քանի որ այդ նախագիծը, որը նախկինում հաստատւած էր, յանձնախումբը, որը մրցութիւնն էր կազմակերպել, այդ ժամանակ մի շարք հարցեր էր առաջ բերել, որ մետրաժը պէտք է մի փոքր աւելանար, եւ որոշ փոփոխութիւններ էին տւել, որոնք արագ իրականացրեց եւ ներկայացրեց մեզ, այսինքն՝ հաստատւել էր ամէն ինչը. մենք միայն այդ եղած քարտէզները պէտք է հասցնէինք գործադրման:

Երկրորդ փուլն էլ աւարտել ենք. երկու քարտէզներն էլ արդէն պատրաստ են. մենք հիմա սպասում ենք գների ճշգրտմանը. դա այս շաբաթ մեզ պէտք է յանձնւի եւ նախքան այն, որ մենք այս փուլին հասնէինք՝ արդէն մի երկու-երեք շաբաթ առաջւանից յայտարարութիւն տւեցինք՝ կապալառուներ ընդունելու համար: Այս բաժինը նախնական որակաւորումն էր, այսինքն՝ տեսնենք, թէ ներկայացւած յայտերից ովքեր կարող են այս աշխատանքը շարունակել, յետոյ արդէն իրենց հրաւիրենք նւազուրդի, մենք դեռ նւազուրդի չենք հրաւիրել, իրենք իրենց մի շարք տեղեկութիւնները պէտք է ներկայացնեն մեզ, որի ժամկէտը մինչեւ անցեալ հինգշաբթի էր եւ արդիւնքում՝ նպատակն այն է, որ տեսնենք, թէ կապալառուն մինչ այժմ ինչպիսի աշխատանքներ էր տարել, նրանց նիւթական վիճակը ինչպէս է. արդեօք կարող են ժամանակին այն պահանջները, որ մենք ունենք հասցնել թէ ոչ:

Յայտեր ներկայացրած 9 անհատների հետ մենք այսօր (երկուշաբթի, դեկտ. 14-ին) հանդիպում ունենք եւ պէտք է նրանց ներկայացրած փաստաթղթերն ուսումնասիրենք:
Պրն. Սարխոշեան, արդեօք կարո՞ղ ենք արձանագրել, որ գործընթացը սկսւած է:

Ռ. Ս.- Գործընթացը, ինչպէս տեսնում էք, վաղուց ընթացքի մէջ է դրւել:

Մեր նախատեսածը մէկ տարւայ ժամկէտ է, այսինքն՝ այն պահից, որ աշխատանքները սկսւեն, մէկ տարով մենք կապալառուին ժամկէտ ենք տալու եւ այդ որակաւորման ճշտումը հէնց այդ նպատակով է, որ տեսնենք, թէ նրանցից, որ մէկն է կարող մեր ճշտորոշած ժամանակահատւածում գործը աւարտել եւ յանձնել:Իհարկէ, մի գործօն եւս կայ, ինչպէս գիտէք, շինարարական աշխատանքները մեր երկրում մի շարք վերիվայրումներ ունեն, միանգամից գները տատանւում են, կապալառուները ապրանք, շինանիւթ չեն կարողանում գնել. իսկ ապագայում ինչպէս կը դասաւորւի, ես չեմ կարող կանխագուշակել, բայց մեր նախատեսումները մէկ տարւայ ժամկէտի շրջանակներում են: Պայմանագիրը կապալառուի հետ ստորագրելուց յետոյ՝ մէկ տարւայ ժամկէտ կը ճշտենք նրա համար, այսինքն՝ կապալառուն դա իմանալով է գալիս եւ իր գինը ներկայացնում:

-Այս հարցերին ի պատասխան՝ դոկտ. Աիդա Յովհաննիսեանն ասաց. «Առանց կալւածագրերի վիճակը ստուգելու՝ դպրոցը քանդւել է, որովհետեւ կալւածը ունի 10 կալւածագիր եւ ընդհանրապէս առանց դրանք քաղաքապետարանին յանձնելու եւ քաղաքապետարանի հետ միասին հողամասի վրայ. այդ քարտէզների դասաւորումը, ընդհանրապէս քաղաքապետարանի պատկան բաժնի կողմից դասաւորումները՝ այդ կալւածագիրը համեմատելու, համապատասխանեցնելու հողամասի տարածքի մետրաժի հետ, ընդհանրապէս մեզ համար պարզ չէր, որ կայ մի կալւածագիր, եւ չէր էլ սպասւում, որ մէկ կալւածագիր յանկարծ մի փոքրիկ տարածքի համար, 170 մետրի համար ընդամէնը, գոյութիւն չունենայ:

Կալւածագիրը, իհարկէ, կորած չէր, այլ ընդհանրապէս երբեք կալւածագիր այդ փոքրիկ տարածքի համար տրւած չի եղել. սա էր հիմնական պատճառը: Երեւի թէ հնարաւոր էր նախապէս քաղաքապետարանի հետ պարագան ստուգել, բայց որովհետեւ ընդհանրապէս չկար այդ պատկերացումը, որ կարող է պատահել 10 հատ կալւածագրերի մէջ մէկ հատը 50 տարի առաջ տրւած չլինի, ընդհանրապէս չէր նախատեսւում նման դժւարութիւն:
«Ալիք»- Պատգամաւորական ժողովի կողմից ժամանակ է ճշտորոշւել՝ մինչեւ մէկ ամիս վիճակը բարելաւելու համար, ի՞նչ կասէք այս մասին: