CNNturk.– Հայաստանը մեր իմացած աղքատ երկիրը չէ
16:01 / 01.04.2010
Թուրքական CNNturk-ի գլխաւոր խմբագիր Մեհմեդ Ալի Բիրանդը իր հերթական հրապարակման մէջ անդրադարձել է օրեր առաջ Հայաստան կատարած այցելութեանը:
«Երկար ժամանակ մի առասպել է տարածւած, որ Հայաստանը այնպէս աղքատ է, այնպէս աղքատ, որի ժողովուրդը մէկ վայրկեան առաջ ցանկանում է Թուրքիայի հետ սահմանի բացումը: Գուցէ այդ առասպելը կը հարմարւի 1990-ականների իրավիճակին: 90-ականներին մի քանի անգամ Երեւան այցելել եմ եւ իրօք, հանդիպել եմ ծայրաստիճան աղքատ Հայաստանի: Այժմ վիճակը այլ է: Ես զարմանքով տեսայ Երեւանի զարգացումը: Պողոտաները վերանորոգւած են եւ մաքուր: Արտասահմանեան յայտնի ապրանքանիշներով խանութների առկայութիւնը ցոյց է տալիս նաեւ ժողովրդի գնողունակութիւնը: Ռեստորանների, երեկոյեան ակումբների, կազինոների առատութիւնը ինձ զարմացրեց: 1.5 միլիոն բնակչութեամբ մայրաքաղաքի գիշերային կեանքը գոյնզգոյն է: Թող սխալ չհասկացւի, պարզապէս ես ուզում եմ ասել, որ աղքատութիւն չկայ: Հայաստանի ընդհանուր վիճակը ճիշտ կը լինի նկարագրել, որպէս միջին ապրելակերպ: Նրանք պատրաստ չեն ամէն ինչ տալ սահմանի բացման համար եւ ինչպէս որ փակ սահմանով ապրել են 17 տարի, այնպէս էլ պատրաստ են շարունակել ապրել:Կոնկրէտ տւեալ չկայ, թէ սահմանի բացումը ինչքան դրական ազդեցութիւն կունենայ Հայաստանի տնտեսութեան վրայ: Բայց չպէտք է մոռանալ, որ դրանից օգտւելու է ոչ միայն Հայաստանը, այլ նաեւ Թուրքիան: Հայաստանի համար կը բացւեն Միջին Արեւելքի եւ Եւրոպայի շուկաները: Կաւելանայ արտահանումը, եւ իհարկէ ներմուծումը աւելի էժան կը լինի: Սահմանների բացումը Թուրքիային եւս ձեռնատու է: ԱՄՆ-ից, Եւրոպայից Թուրքիա եկող զբօսաշրջիկների քանակը կաւելանայ: Թուրքիան կարող է աշխուժացնել Սեւ ծովի եւ Միջերկրական ծովի նաւահանգիստների աշխատանքը, աւելացնել առեւտրաշրջանառութիւնը: Վան-Կարս տարածաշրջանում առեւտուրը, տուրիզմը կաշխուժանայ: Թուրքական ապրանքերը աւելի էժան կմտնեն Հայաստան: Աւելի կարեւոր բան, Թուրքիան իր արտադրանքը աւելի էժան եւ աւելի հեշտութեամբ կը հասցնի Միջին Ասիայի շուկաները:
Ցեղասպանութիւնը մի այլ կարգի է արմատաւորւել Հայ հասարակութեան կեանքում: Հայ ուսանողներին հարցնում ենք. „Եթէ Թուրքիան ընդունի Ցեղասպանութիւնը, ինչ էք անելու, սկզբից հող էք պահանջելու, թէ փոխհատուցում“,-պարզապէս զարմացած նայում են եւ չգիտեն ինչ պատասխանել: Այդ խնդիր ակադեմիկոսները եւ մտաւորականները լրիւ այլ կերպ էին ընդունում»,-նշել է իր հրապարակման մէջ Մեհմեդ Ալի Բիրանդը:
Լուրեր Հայաստանից
*** Նկատի ունենալով, որ լուրը հաղորդել է թրքական աղբիւր, առաջարկւում է կարդալ նաեւ հետեւեալ յօդւածը, կապւած ապատեղեկատւութեան հետ՝
Posts
0 Պատգամ:
Post a Comment