ՏՐԱՄԱԳԻԾ

«Հայաստանի նոր նախագահի եւ նոր Արտաքին Գործերի նախարարի հրապարակային բանակցութիւնների ճանապարհով արագ արդիւնքների հասնելու ձգտումը մենք որակում ենք առնւազն որպէս անզգուշութիւն, որի գինը մեր ժողովրդի համար կարող է թանկ լինել»,- ասաց նա ու ներկայացրեց «ֆուտբոլային դիւանագիտութեան» 14 ամիսներին Թուրքիայի ձեռքբերումներն ու Հայաստանի կորուստները:

«Թուրքիան արձանագրել է շոշափելի նւաճումներ.
1. Այսօր աշխարհով մէկ հայոց ցեղասպանութեան ճանաչման գործընթացը սառեցւած վիճակում է: Մենք տեղեկութիւն ունենք որոշ երկրներից, որոնք ժամանակին ճանաչել ու դատապարտել են ցեղասպանութիւնը, իսկ այսօր փոշմանում են եւ իրենց քայլը դիտում որպէս դիւանագիտական սխալ:
2. Կտրուկ աճել է Թուրքիայի միջազգային հեղինակությիւնը: Այսօր ոչ ոք չի յիշում Հայաստանի Հանրապետութեան նախագահի Գիւլին Հայաստան հրաւիրելու այսպէս կոչւած խիզախ քայլը: Բոլոր լրատւամիջոցները լծւած են թուրք նախագահի Հայաստան այցելելու խիզախ քայլը գովաբանելով:
3. Թուրքիան դարձել է ՄԱԿ-ի ԱԽ անդամ, ընդլայնել իր կապերը Ռուսաստանի հետ, այսօր էլ լուծում է սիրիա-իրաքեան յարաբերութիւնները:
4. Եւրո Միութեան անդամ դառնալու Թուրքիայի հնարաւորութիւնները աճել են»:
Իսկ Հայաստանն, ըստ Վ. Յովհաննիսեանի, միայն կորուստներ է ունեցել.
«1. Նախագահ Օբաման ետ կանգնեց ցեղասպանութիւնը ճանաչելու իր խոստումից, որի կատարամանը շատ մօտ էր:
2. ԱՄՆ-ի դատարանը որոշեց ցեղասպանութեան զոհերի ժառանգներին զրկել նիւթական փոխյատուցումից:
3. Ռուսաստանի քաղաքականութեան մէջ աւելի ու աւելի նկատելի է դառնում Հայաստանի շահերի անտեսումը: Օրինակ վերջին նախաձեռնութիւնը ողջունող իր յայտարարութեան մէջ Ռուսաստանը Թուրքիային եւ Հայաստանին հաւասարաչափ դիտում է որպէս բարեկամ երկրներ: Ռուսաստանում կարծես մօռացել են, որ Թուրքիան ՆԱՏՕ-ի անդամ է, իսկ Հայաստանը` Ռուաստանի Դաշնութեան ռազմավարական դաշնակից:
4. Խորանում է Սփիւռքի օտարումը Հայաստանից:
5. Վրաստանի իշխանութիւնների կողմից կսմիթներով հող պոկելը նույնպէս պայմանաւորւած է նրանով, որ Հայաստանի համակերպւելու հոտն են զգացել:
6. Առաջին անգամ է, որ թուրք դիւանագէտը անձնական վիրաւորանք է հասցնում Հայաստանի Հանրապետութեան նախագահին` խորհուրդ տալով նրան որպէս պարզ ֆուտբոլասէր, գնալ Թուրքիա ինքնաթիռով»:

Այս ամէնը, ըստ դաշնակցական գործիչի, վկայում է, որ բանակցային գործընթացն իր դեռեւս անաւարտ տեսքով արդէն հարւածել է Հայաստանի Հանրապետութեան շահերին եւ միջազգային հեղինակութեանը: