ԵԹԷ ԲԱՑՒԻ ՍԱՀՄԱՆԸ՝
«ԹՈՒՐՔԻԱՆ ԿՈՒԼ ԿԸ ՏԱՅ ՀԱՅԱՍՏԱՆԻՆ»
Հ.Յ.Դ. յայտարարած ակցիայի` հացադուլ-նստացոյցի 7 օրերին որեւէ պետական պաշտօնեայ չի մօտեցել դաշնակցականներին: Հացադուլաւորներով չեն հետաքրքրւել նաեւ «Շտապօգնութեան» բժիշկները:
Ինչպէս «Ա1+»-ին տեղեկացրեց ԿԸՀ անդամ Համլետ Աբրահամեանը, որն այսօր երկրորդ օրն է հացադուլի մէջ է, իրենք կարիք չունեն բժշկական աջակցութեան, քանի որ իրենց մէջ էլ բժիշկներ կան եւ յարկ եղած դէպքում օգնում են: Ի դէպ, արդէն «իր բաժին» հացադուլն արել է նաեւ Հ.Հ. առողջապահութեան նախկին նախարար Նորայր Դաւիդեանը: «Մեր միւս ղեկավարներն էլ կը նստեն հացադուլի, դեռ մինչեւ հոկտեմբերի 13-ը այստեղ ենք»,-ասաց հացադուլաւոր դաշնակցականներից մէկը: Նրանք վստահ են, որ իրենց պայքարը արդիւնք տալու է: Այս օրերի ընթացքում բաւականին շատ ստորագրութիւններ հաւաքւել են նախաստորագրւած արձանագրութիւնների դէմ:
«Այո, հայ-թուրքական յարաբերութիւններում պէտք է լինեն նախապայմաններ, բայց մեր կողմից: Մինչեւ ցեղասպանութիւնը չճանաչեն, Սեւրի դաշնագիրը չճանաչեն, Ղարաբաղի անկախութիւնը չճանաչւի, թուրքերի հետ ոչ մի սահման բացել, ոչ մի դիւանագիտութիւն»,-«Ա1+»-ի հետ զրոյցում ասաց նստացոյցի մասնակից Զաւէնը:
Սփիւռքահայ մի կին, որը միացաւ ստորագրահաւաքին, իր դիրքորոշումը «Ա1+»-ին բացատրեց հետեւեալ կերպ. «Քանի որ ես ծնւել եւ մեծացել եմ Թուրքիայում, գիտեմ` ինչ ասել է թուրք, դա ինչ ազգ է, զգացել եմ մաշկիս վրայ, եւ այդ պատճառով էլ չեմ ուզում սահմանը բացւի: Թուրքիան երբ մտնի Հայաստան, վիշապի նման բերանը բաց կանի եւ ամբողջ Հայաստանը կուլ կտայ, ուղղակի իր բերանը կը բացի ու կփակի, ու վերջ, չկայ Հայաստանը»:Այսօր չնայած անձրեւային եղանակին, արդէն աւելի քան 100 հոգի ստորագրել էին: Իսկ ստորագրութիւնների վերջնական թիւը կը հրապարակի ՀՅԴ Գերագոյն Մարմինը: Իսկ արդեօ՞ք անձրեւը «չի կոտրում» նստացոյցի մասնակիցներին եւ հացադուլաւորներին: «Ոչ, մրսեցնում է, սառեցնում է, հիւանդացնում է, բայց չի կոտրում»,-ասացին դաշնակցականները, ովքեր վստահ են, որ իրենց պայքարը արդիւնք կը տայ:
«Ա1+»-ի դիտարկմանը, թէ 7 օրերի ընթացքում որեւէ փոփոխութիւն պաշտօնական դիրքորոշման մէջ չկայ, դաշնակցականներից մէկն ասաց. «Եթէ պայքարի այս ձեւը արդիւնք չտայ, մենք գիտենք նաեւ այլ ձեւեր, այդ դէպքում կը մտածենք այլ միջոցների դիմելու մասին»:
Posts
0 Պատգամ:
Post a Comment