Հայ դիւանագէտները կարեւորում են երրորդ ուժի բացակայութիւնը Հայաստանի եւ Թուրքիայի միջեւ երկկողմ յարաբերութիւնների զարգացման վերաբերեալ ձեռք բերւած համաձայնութեան հարցում
ԵՐԵՒԱՆ, 1 ՍԵՊՏԵՄԲԵՐԻ, ԱՐՄԷՆՊՐԵՍ:Հայաստանի եւ Թուրքիայի միջեւ երկկողմ յարաբերութիւնների զարգացման մասին ձեռք բերւած համաձայնութիւնն անսպասելի չէր, քանի որ այդ գործընթացը տարւում էր:
Հայաստանի համար անընդունելի կը լինէր երրորդ կողմի գործօնը, այսինքն` հայ-թրքական յարաբերութիւնների կարգաւորման գործընթացում Ադրբեջանի եւ Լեռնային Ղարաբաղի հիմնախնդրի առկայութեան հարցը:
Հայաստանի, Թուրքիայի եւ Շւէյցարիայի արտաքին քաղաքական գերտեսչութիւնների` երէկ տարածած փաստաթղթի առնչութեամբ նման գնահատական տւեց Եւրախորհրդում ՀՀ մշտական ներկայացուցիչ Զոհրաբ Մնացականեանն այսօր Ֆրանսիական համալսարանում բուհի ուսանողութեան եւ լրագրողների հետ հանդիպման ժամանակ:
Նա ընդգծեց, որ Հայաստանի համար կարեւոր է անվտանգութեան հարցի լուծումը, ինչպէս նաեւ հարեւանի հետ յարաբերութիւնների զարգացումը` հաշւի առնելով հանդերձ երկրի համար կարեւորագոյն սկզբունքները: Զ. Մնացականեանը նշեց, որ հայ-թրքական յարաբերութիւնների զարգացման գործընթացին թէ Հայաստանում, թէ սփիւռքում որեւէ երկրորդ կարծիք չկայ պատմական անցեալի վերաբերեալ, այն է` պատմական անցեալը չի կարող մոռացութեան տրւել:
«Երկկողմ յարաբերութիւններ հաստատելու եւ մեր պատմական անցեալի համադրումը բաւական զգայուն հարց է: Մենք ունենք համաձայնութեան գալու յստակ սահմաններ: Այժմ մտնում ենք հանրային քննարկումների փուլ, եւ կարեւոր է ճիշտ գնահատել կատարւածը»,- ասաց նա:
Բելգիայում ՀՀ արտակարգ եւ լիազօր դեսպան, Եւրոմիութիւնում ՀՀ պատւիրակութեան ղեկավար Աւետ Ադոնցի խօսքով` 21-րդ դարում ընդունելի չեն փակ սահմանները, պատերազմի բացակայութեան պայմաններում դիւանագիտական յարաբերութիւններ չունենալը: «Սա Հայաստանի Հանրապետութեան նախաձեռնութեան հերթական քայլն էր:
Ինչ քայլեր էլ ձեռնարկւեն, մեր սկզբունքը պէտք է լինի արժանապատւութիւնը: Սրանով արդէն պաշտօնական ընթացք է ստանում»,- կարծիք յայտնեց նա` նույնպէս կարեւորելով երրորդ կողմի բացակայութիւնը:Անդրադառնալով ՀՀ դիւանագիտութեան ներկայ մակարդակին եւ արտաքին քաղաքականութեան որդեգրած հիմնական սկզբունքներին` Ա. Ադոնցը նշեց, որ այն գնահատելու համար պէտք է բացառել հետընթաց բառը, բնութագրելով այն որպէս առաջընթաց:
Նման գնահատականի համար հիմք է հանդիսանում Լեռնային Ղարաբաղի հիմնախնդրի կարգաւորման գործընթացում բաւական շօշափելի եւ նոր որակական զարգացումների արձանագրումը, հայ-թրքական յարաբերութիւնների շուրջ բաց քննարկումների անցկացումը, ինչպէս նաեւ ԱՄՆ-ի, ԵՄ-ի հետ որակական նոր յարաբերութիւններ ձեւաւորումը:
Զ. Մնացականեանն իր հերթին կարեւորեց ԱՄՆ-ի, ԵՄ-ի, ռազմավարական դաշնակից Ռուսաստանի, ինչպէս նաեւ անմիջական հարեւանների հետ յարաբերութիւնները, քանի որ Հայաստանը չափազանց զգայուն է այն գործընթացների հանդէպ, որ տեղի են ունենում տարածաշրջանում: Ըստ նրա` ՀՀ արտաքին քաղաքականութեան մէջ կան երկու առաջնահերթ նպատակներ` երկրի անվտանգութեան ապահովումը եւ զարգացմանը, որոնց լուծմանն էլ ուղղւած են ՀՀ-ի արտաքին քաղաքականութեան մի շարք հիմնական ուղղութիւնները:
Դիւանագէտները պատասխանեցին ուսանողների այլ հարցերին եւս, որոնք վերաբերում էին Հայաստանը ԵՄ-ին անդամակցութեան հնարաւորութիւնների, ԵՄ-ին Թուրքիայի անդամակցութեան հաւանականութեանը, խոչընդոտներին եւ հեռանկարներին:
Posts
0 Պատգամ:
Post a Comment