ԽՄԲԱԳՐԱԿԱՆ
Ազգային ու պետական շահերին համահունչ դիւանագիտութիւն է հարկաւոր... .
Երէկ Հ. Յ. Դաշնակցութիւնը երեւանեան հանրահաւաքով իր յստակ ու սկզբունքային դիրքորոշումը արտայայտեց հայ-թրքական նախաստորագրւած փաստաթղթերի դէմ:
ՀՅԴ-ն դեռ Հայաստանի կոալիցիոն (համաձայնական) կառավարութեան մաս կազմած ժամանակ տեղեակ է եղել սոյն փաստաթղթերին յանգեցնող բանակցային ողջ գործընթացին եւ տեղին ու պահին համարժէք, իր անհամաձայնութիւնն է յայտնել ու մինչեւ իսկ հրապարակել այդ տարաձայնութիւնը՝ կառավարութեան տւեալ կողմնորոշմանը:
Դա, սակայն, յանգեցրեց նրան, որ ՀՅԴ-ն նոյն սկզբունքային ու քաղաքական կողմնորոշմանը կառչելով՝ դադարեց կոալիցիոն կառավարութեանը մաս կազմելուց եւ իր քաղաքական-ազգային գործունէութիւնը փոխարինեց այլ դաշտում կառուցողական ընդդիմադիրի ձեւաչափով գործունէութիւն ծաւալելով:
Թէ՛ որպէս կոալիցիոնի անդամ, եւ թէ՛ ընդդիմադիր կուսակցութիւն՝ Հ. Յ. Դաշնակցութիւնը համազգային նշանակութեան հիմնահարցերի ու Հայ Դատի պահանջատիրութեան, եւ մասնաւորապէս հայ-թրքական յարաբերութիւնների վերաբերեալ, կիրառել է ազգային-պետական շահերին համահունչ ռազմավարական ու մարտավարական նպատակներ եւ քայլեր վերցրել՝ այդ ուղղութեամբ:
Միեւնոյն շահերը անտեսող, վտանգող իւրաքանչիւր դիրքորոշում՝ իշխանական թէ՛ այլեւայլ քաղաքական շրջանակներից ու ճամբարներից, աներկբայօրէն հանդիպել է ՀՅԴ-ի ընդդիմութեանը, քննադատութեանն ու կարելի բոլոր միջոցներով՝ ձախողեցմանը:
Երէկւայ հանրահաւաքը մէկն էր հէնց այդ միջոցառումներից, որը գալիս էր մէկ անգամ եւս փաստելու, որ ՀՅԴ-ն իր շուրջ համախմբւած բազմահազար համախոհներով (Հայաստանում եւ Սփիւռքում) քայլեր է առնում՝ բացառապէս մղւած համընդհանուր՝ երկրի ու ժողովրդի շահերից եւ հեռու է պահի ու իրադրային մթնոլորտից մղւած՝ ինքնանպատակ գործողութիւններից:-
ՀՅԴ-ն, ինչպէս բազմիցս է յայտարարել, դէմ չէ Հայաստան-Թուրքիա դիւանագիտական յարաբերութիւնների վերականգնմանը. - ՀՅԴ-ն դէմ չէ հայ-թրքական սահմանի բացմանը.Բայց ՀՅԴ-ն դէմ է դրանց հասնելու՝ ազգային-պետական շահերի ու նախկին, ներկայ ու յատկապէս ապագայ սերունդների հաշւին անդառնալի ու վտանգաւոր զիջումներով ու պարտութեան մատնող դիւանագիտութեամբ:
ՀՀ արտաքին քաղաքականութեան ու դիւանագիտութեան գերատեսուչ յարգարժան Էդւարդ Նալբանդեանի լրագրողների հաւաքում «արդարացումները» թէ՝ «Ամբողջ աշխարհն է պահանջում, որ կարգաւորւի հայ-թրքական յարաբերութիւնը...», ամենեւին էլ չի նշանակում, որ ՀՀ արտաքին քաղաքականութիւնը պիտի շեղւի ազգային-պետական ուղեգծից:
Իսկ նման շեղումները ակնբախ են հայ-թրքական յարաբերութիւնների կարգաւորման առթիւ հրապարակւած զոյգ փաստաթղթերում եւ որ դրանց մասին դեռ առիթ կունենանք խորհելու առաջիկայ հրապարակումներում:
Posts
0 Պատգամ:
Post a Comment