ԽՄԲԱԳՐԱԿԱՆ-
Վեց Շաբաթեայ Ժամկէտ՝ Ձախողեցնելու Համար Հակահայկական Նախաձեռնութիւնը
Վեց շաբաթից արդէն մի քանի օր էլ պակսել է: Թանկագին ժամանակ է կորսւել ու իւրաքանչիւր անցնող օր պարտաւոր ենք յագեցնել այնպիսի յարաբերական, բացատրական, զեկուցական ու ցուցական աշխատանքներով, որոնց շնորհիւ կարելի պիտի լինի այս համայնքը, մեր համայնքը զօրաշարժի ենթարկել ու արտայայտել, դրսեւորել համընդհանուր մեր ընդդիմութիւնը՝ հայ-թրքական յարաբերութիւնների բարեկարգման անունով կատարւած Հայաստանի իշխանութեանց միակողմանի անձնատւութեան:
Մեր դիմագրաւած սպառնալիքի տարողութիւնն ու լրջութիւնը մեզանից ուրիշ որակի աշխատանք է պահանջում: Սովորական կոչերով, հանդիպումներով, հաւաքներով չենք կարող բաւարարւել ու չենք կարող բախտի ու պատահականութեան թողնել հաւաքական մեր ընդդիմութեան արտայայտութիւնների դրսեւորումները, որոնք բոլորն էլ պէտք է լինեն ազդեցիկ, տպաւորիչ, շեշտակի:
Այդպէս պէտք է լինեն, որպէսզի պատգամը տեղ հասնի, որպէսզի Հայաստանի պետական պատասխանատուները հասկանան ու գիտակցեն մեր ընդվզումի ու բարկութեան սաստկութիւնը, որպէսզի անդրադառնան, թէ ինչպիսի՛ վտանգների կառաջնորդէն թէ՛ մեր նոր պետականութիւնը եւ թէ հայորդիների արեամբ նւիրագործւած Ղարաբաղի անկախութիւնը:
Այս լուրջ մարտահրաւէրը պարտաւորւած ենք միասին դիմագրաւելու, այստեղ եւ ամէնուր:
Միասին՝ տարբեր քաղաքական ու գաղափարական համոզումներ ունեցող կուսակցութիւններով, Միասին՝ հասարակական, մշակութային, բարեսիրական, մարզական, երիտասարդական, հայրենակցական ու ընկերային միութիւններով ու կազմակերպութիւններով, Միասին՝ մտաւորականութեամբ ու ժողովրդով, Միասին, բոլորս, պէտք է կարողանանք համոզել, ապացուցել առ որ անկ է, թէ երբ մեզ կը դնեն մեր երկրի գերիշխանութիւնը, մեր ազգային ձգտումների եւ իրաւունքների կռւանները կորցնելու երկընտրանքի առջեւ, մենք կարող ենք ստեղծել հաւաքական ծառացումի այնպիսի իրավիճակ, որին չի կարող հաշւի չառնել, եւ որի հետ կարելի չէ հաշւի չնստել:
Ահազանգը հնչած է բոլորիս համար: Այստեղ, ո՛չ առաջինը շարժելու պատւախնդրութիւնը կարեւոր է, ո՛չ էլ քաղաքական յաւակնութիւնների բախման ժամանակն է: Մենք պատրաստ ենք որեւէ առաջարկ, որեւէ ծրագիր քննելու, եւ բոլոր առաջարկներն ու ծրագրերը միասնական դարձնելու անկեղծ տրամադրութեամբ կը շարժենք: Կարեւո՛րը, էակա՛նը, կենսակա՛նը՝ ձախողեցնելն է հայավնաս պայմանաւորւածութիւնները:
«ԱՍՊԱՐԷԶ»
Posts
0 Պատգամ:
Post a Comment