ԱՐԱ ԱՍԼԱՆԵԱՆԸ ՀՄՏՈՒԹԵԱՄԲ՝ ՍԱԿԱՅՆ ԱՆԺԱՄԱՆԱԿ ԿԱՏԱՐԵՑ ԻՐ ՎԵՐՋԻՆ ԱՐԱՐԸ
(Անհաւատալի թռիչքի 40 օրեակի առիթով)
2009 թւականն իր աւարտին՝ տխուր դեր յանձնարարեց Իրանահայ տաղանդաւոր դերասան, ասմունքող եւ ֆոտոլուսանկարիչ՝ Արա Ասլանեանին։Այս անգամ նրան յանձնարարեցին մահւան դերը։
Բայց սա միւս դերերի նման չունեցաւ իր բնական աւարտը, որից յետոյ բեմականներըԵրեքշաբթի դեկտեմբերի 8–ին, հոծ թւով հայրենակիցների ու միութենականների ներկայութեամբ, կատարւեց իրանահայ արւեստագէտ, դերասան, ասմունքող ու ֆոտոլուսանկարիչ՝ Արա Ասլանեանի հանդիսաւոր յուղարկաւորման ու թաղման արարողութիւները՝ սկսած Թեհրանի Ս. Աստւածածին եկեղեցուց։
Դեռ պայմանաւորւած ժամը մէկից առաջ, բազմաթիւ հայեր փութացել էին եկեղեցի, վերջին հրաժեշտը տալու համար իրենց համայնքի կարող ուժերից մէկին, հարազատին եւ միութենական ընկերոջը, որ իր կարճատեւ կեանքին արդէն իսկ հրաժեշտ էր տւել շաբաթ դեկտեմբերի 5–ին, վաղ առաւօտեան։
Սուրբ Աստւածածին եկեղեցում նորոգ հանգուցեալ Արա Ասլանեանի դին շրջապատւած էր հարազատներով, երբ Թեմակալ առաջնորդի նախագահութեամբ կատարւեց յուղարկաւորման եկեղեցական արարողութիւնը։ Թեհրանի Հայոց Թեմի առաջնորդ ՏԷր Սեպուհ Ս. Արք. Սարգսեանը յաւարտ արարողութեան, յաւուր պատշաճի արտայայտւելով Արա Ասլանեանի ազգային, միութենական, մշակութային կարողութիւնների մասին, իր ցաւակցութիւններն յայտնեց հանգուցեալի հարազատներին։
Եկեղեցու բակ փոխադրւելով դին, խոր յուզումի ու արցուքոտ աչքերով լի հարազատներով ու ընկերներով շրջապատւած դագաղի առջեւ, յանուն Թեհրանի Հայ Դատի յանձնախմբի բարեկամների, Հ. Ուս. «Չհարմհալ» միութեան եւ Հ. Մ. «Արարատ» Կազմակերպութեան, յուզիչ դամբանական կարդաց Սեդրակ Գոջամանեանը։
Դամբանականը վերջում որպէս վերջին հրաժեշտ Արա Ասլանեանին, իր գալիք յոբելեանների ու ամեակների փոխարէն քաջալերանքի ծափողջոյններով բարի երթ մաղթեց Արա Ասլանեանին, ու նրա հետ համախմբւած ծափահարեց հասարակութիւնը։
Դին փոխադրւելով Նոր Բուրաստան գերեզմանատուն, պատշաճ կրօնական կարգից յետոյ, առջեւից գնացող բազմաթիւ ծաղկեպսակների ու մեծ թւով յուղարկաւորների գուրգուրանքի կենտրոնում գտնւող դին փոխադրւեց իր յաւերժական բնակարանը՝ իր սիրասուն հօր կողքին, ուր եւ ամփոփւեց։
Հանգուցեալ Արա Ասլանեանի շիրիմի առջեւ, յանուն արւեստագէտների ու գործակիցների արտայայտւեց՝ համայնքիս վաստակաւոր բեմադիրչ, դերասան եւ ֆիլմարւեստի ու թատրոնի գործիչ պրն. Սուրէն Մնացականեանը։
ԱՐԱ ԱՍԼԱՆԵԱՆԸ՝ ԸՆՏԱՆԻՔԻ ԵՒ ԲԵՄԻ ՄԱՐԴ...(ԴԱՄԲԱՆԱԿԱՆ՝ ԸՆԹԵՐՑՒԱԾ ՅՈՒՂԱՐԿԱՒՈՐՈՒԹԵԱՆ ԱՐԱՐՈՂՈՒԹԵԱՆ)
Յարգելի ներկաներ, սգագիր հարազատներ, բարեկամներ եւ ընկերներ,Թեհրանի Հայ Դատի յանձնախմբի բարեկամների, Հ. Ուս. «Չհարմահալ» միութեան, եւ Հ. Մ. «Արարատ» կազմակերպութեան անունից, սգում ենք իրանահայ անւանի արւեստագէտ Արա Ասլանեանի վաղաժամ մահը։
Մի մարդու, որի կեանքն ու ստեղծագործական աշխարհը իր բնազդի եւ էութեան նման, համեստ է ու մաքուր, ազնիւ է ու յաւիտենական։Անդրադառնալով նրա կենսագրութեանը՝ պիտի նշել, որ Արա Ասլանեանը ծնւել է 1962 թ. Թեհրանում։Իր տարրական եւ ուղեցոյց ուսումը ստացել է «Ն. Գիւլբենգեան» դպրոցում, իսկ միջնակարգ կրթութիւնը՝ «Մոբթաքեր» արհեստագիտական պետական ուսումնարանում, որից յետոյ 2 տարի կատարել է իր զինւորական ծառայութիւնը՝ Իրան–Իրաք պատերազմի թէժ տարիներում։
Ծնւած լինելով արւեստագէտի ընտանիքում, մանուկ հասակից ոչ միայն սէր ու հակում, այլ նւիրում ու ամբողջական ընծայման զգացում ու գիտակցութիւն ունէր միութենական, մշակութային, ազգային ու ընկերային–հասարական կեանքի հանդէպ։
Հայրը՝ անւանի ու վաստակաւոր դերասան եւ բեմադրիչ Էդիկ Ասլանեանը եւ մայրը ազնւափայլ տկն. Հիլդան,– որ նոյնպէս իր մանկութիւնն ու երիտասարդութիւնը անց էր կացրել միութենական աշխարհում՝ Արայի եւ իր անզուգական քրոջ Օդէթի մէջ մանկութեան տարիներից ի վեր դրել էին սէր ու ջանադրում՝ մշակոյթի արւեստի եւ ազգասիրութեան բնագաւառներում։
Արան մանուկ հասակից եղել է Հ. Բ. Ը. Մ.–ի սկաուտական կազմակերպութեան անդամ եւ այդ ասպարէզում աշխատել երկար տարիներ։ Զբաղւել է նաեւ երաժշտութեամբ եւ յաճախել պատկան արւեստանոցը։ Նւագում էր երգեհոն, շւի, շեփոր, որով բազում անգամներ ազգային–հասարակական հանդէսներին հնչում էր իր սրտաճմլիկ ու սրտառոչ երաժշտական կատարումը՝ նոր ու թարմ շունչ ու ոգի հաղորդելով հասարակութեան։
Նաեւ տարիներ երգել է «Սեւան» երգչախմբում։ Մասնակցել է «Չհարմահալ» միութեան «Գեղարդ» թատերախմբին, հայ փորձնական թատրոնի եւ Հ. Մ. «Արարատ» կազմակերպութեան աշխատանքներին։
1991 թ. Ամուսնացել է մեր համայնքի սիրւած ուսուցչուհիներից օր. Նինետ Ծատրեանի հետ եւ բախտաւորւել մէկ աղջիկ զաւակով՝ Ալինով։Արան իր առօրեայի խոշոր տոկոսը յատկացնում էր իր ընտանիքին, իր սիրասուն աղջիկը՝ Ալինը իր բոլոր մտածումների, նոյնիսկ ստեղծագործական կեանքի մեկնակէտն ու զգացական աղբիւրն էր։ Նա միշտ ասում էր արւեստագէտի ամենամեծ բախտը լաւ ընտանիք ունենալն է, իսկ ամուսնութեան ամենահաճելին միւս կէսի հետ ընկեր լինելն ու փոխհասկացողութիւնը, որը վաստակեց մեր սիրելի Արան Նինետի, Ալինի ու ողջ իր ընտանիքի հետ։
Վերադառնալով Արա Ասլանեանի բեմական կեանքին, պիտի ասենք, որ Արայի ազգային–հասարակական ու մշակութային կեանքի թագն ու պսակը ասմունքն էր, բայց մանաւանդ թատրոնը։ Այն բարձրագոյն արւեստը, որ մանկութիւնից իր արեան եւ կաշւի իւրաքանչիւր բջիջի գերագոյնն էր եւ ամենասուրբը։
Արայի առաջին կերպարը Յարութիւն Մինասեանի «Անգլերէն խօսելու եղանակ» ներկայացումից սկսւեց, ապա նա իր շնորհքն ու տաղանդը մարմնաւորեց աւելի բարդ ու արհեստավարժ կերպարներում, որոնցից նշելի են «Պարոյր Հայկազն ու Մովէս Խորենացին», «Մեծ լռութիւնը», «Արիւնոտ թագը», «Սիաւոշ եւ Սուդաբէ», «Ոտքի դատարանն է գալիս», «Կիլիկիոյ արքան», «Աստծոյ 12 օրը», «Անքաւելին», «Դաւիթ Բէգ», «Վարազդատ», «Ինկած բերդի իշխանուհին», «Շխոնց Միհրան», «Վիլիամ Սարյեան», «Եսի մարդը», իսկ Արթուր Միլերի «Իմ բոլոր զաւակները» մնաց կիսատ՝ չհասաւ բեմադրութեան։ 
Նաեւ կինոյի ասպարէզում դերեր է ստանձնել Սուրէն Մնացականեանի «Մեսրոպ Մաշտոց», Վարուժ Քարիմ Մասիհիի «Տարակուսանք» եւ Շահրամ Ասադիի «Դէպքի գիշերը» ֆիլմերում։ Այսքան վաստակ 47 տարիներում շահել եւ լինել իրապէս սիրւած ու յարգւած, ընկերասէր, ազնիւ ու համբերատար, եւ անկասկած սա է յաւերժութեան ամենամեծ գաղտնիքը։
Սիրելի Արա աւաղ վարագոյրները իջել են բեմի, երանի թէ այժմ աճիւնիտ մօտ կանգնած վերանար իրական կեանքի ու թատրոնի անջրպետ հիւսող ընդհանրութիւնը, բոլոր կերտած դերերդ քաղցր են ու սիրելի, սակայն վերջին խաղդ ու կերպարը մեզ դուր չգալով հանդերձ քեզ միացրեց յաւերժութեան եւ յաւիտենութեան։ Թող բոլոր կերպարներդ այսօր քեզ տանեն երկինք, թող բոլոր խաղերդ լինեն յաւերժ, ու թող կերտած վաստակդ լինի ռահվիրա յաջորդներիդ կեանքին եւ ստեղծագործութեան։Բարի երթ սիրելի ճամբորդ, բարի ճանապարհ սիրելի ընկեր, բարի... բարի մեկնում դէպի երկնային կապտաւուն բեմ ու յաւիտենական արար։
Սիրելիներ, որպէս վերջին հրաժեշտ Արա Ասլանեանին, իր գալիք յոբելեանների եւ ամեակների փոխարէն, քաջալերանքի ծափողջոյններով բարի երթ մաղթենք։
Հողի ծանրութիւնը երբեք չզգաս վրադ, սիրելի Արա։
*Արա Ասլանեանը նաեւ Մեսրոպ Մաշտոցի դերում երեւան եկաւ Սուրէն Մնացականեան բեմադրութեամբ տեսաժապաւէնում, որի լուսանկարները պահ առնելով ժապաւէնի Նկարահանող՝ Կարէն Մնացականեանից տեղադրում ենք նիւթի մէջ։
Posts
0 Պատգամ:
Post a Comment