Դադարեցրէք տեղեկատւական պատերազմը
Լրատւամիջոցներին ուղղւած կոչ Ստեփանակերտից
17:13 • 07.05.10
Ստեփանակերտի մամուլի ակումբի նախագահ Գեղամ Բաղդասարեանն այսօր հանդէս է եկել քարոզչական պատերազմը դադարեցնելու յայտարարութեամբ՝ ուղղւած Հայաստանի, Ադրբեջանի և Լեռնային Ղարաբաղի լրատւամիջոցներին և լրագրողական կազմակերպութիւնների ղեկավարներին։
«Ղարաբաղեան ճակատում 1994 թւականին հաստատւած հրադադարը կարևոր դեր է խաղացել հակամարտող կողմերի միջև ռազմական դիմակայութեան դադարեցման և բանակցային գործընթացի աշխուժացման գործում։ Սակայն դա բաւարար չէր հակամարտութեան վերջնական կարգաւորման համար։ Աւելին՝ «ոչ պատերազմ, ոչ խաղաղութիւն» վիճակը և միջպետական պաշտօնական յարաբերութիւնների բացակայութիւնը վերջին տարիներին ոչ միայն նպաստել են լարւածութեան սրմանը հակամարտութեան գօտում, այլև աստիճանաբար ծանրացրել են «ոչ պատերազմ, ոչ խաղաղութիւն» կոչւող ռազմաքաղաքական կշէռքի «ոչ խաղաղութիւն» նժարը։Եւ այս գործում, ցաւօք սրտի, պարսաւելի դեր է կատարում մասս-մեդիան։ Շարունակւող և արդէն իսկ վտանգաւոր թափ առած տեղեկատւական պատերազմը կամա-ակամայ խաղում է, այսպէս կոչւած, հրետանային նախապատրաստութեան դեր, նպաստելով ուժային լուծման անխուսափելիութեանը, լուծում, որն աղետալից հետևանքներ կունենայ հարաւկովկասեան ողջ տարածաշրջանի համար։
Այս ոչ դիւրին իրավիճակում և 1994 թւականի մայիսի 12-ին կնքւած հրադադարի համաձայնագրի 16-ամեակի նախօրէին նպատակայարմար եմ գտնում հանդէս գալ նախաձեռնութեամբ, որը միտւած է հակամարտութեան բոլոր կողմերի տեղեկատւական դաշտում «հրադադարի» հաստատմանը և ռազմական դիմակայութեան տարիներին ստեղծւած «թշնամու կերպարից» աստիճանական հրաժարմանը։ Վստահ եմ, որ տեղեկատւական դաշտում հրադադարը բարենպաստ պայմաններ կստեղծի Ղարաբաղեան կարգաւորման գործընթացում խաղաղ երկխօսութեան շարունակման համար, կը նպաստի իրական փոխզիջումների և փոխընդունելի լուծումների որոնմանը և այս հարցում կողմերի մասս-մեդիաների դիրքորոշումների մերձեցմանը։
Ադրբեջանի, Հայաստանի և Լեռնային Ղարաբաղի լրատւամիջոցների ու լրագրողական կազմակերպութիւնների ղեկավարներին կոչ եմ անում նպաստել տեղեկատւական դաշտում 2010 թւականի մայիսի 12-ի 00 ժամ 01 րոպէից թշնամական գործողութիւնների դադարեցմանը։ Սա առաջին հերթին նշանակում է հրաժարում այնպիսի հրապարակումներից, որոնք վիրաւորում են ամբողջ ազգի ու նրա առանձին ներկայացուցիչների պատիւն ու արժանապատւութիւնը, ինչպէս նաև ազգամիջեան թշնամանք ու պատերազմի քարոզչութիւն են պարունակում»,–ասւում է յայտարարությեան մէջ։
Tert.am
Posts
0 Պատգամ:
Post a Comment