ԿՍՏԵՂԾՒԻ ՄԻՋԿԱՌԱՎԱՐԱԿԱՆ ՅԱՆՁՆԱԺՈՂՈՎ
Հայաստանի եւ Լեհաստանի արտաքին գործերի նախարարութիւնների միջեւ քաղաքական խորհրդատւութիւններ անցկացնելու նպատակով Հայաստանի արտաքին գործերի փոխնախարար Կարինէ Ղազինեանը երկօրեայ այցով ժամանել է Վարշաւա:
Այցի առաջին օրը տիկին Ղազինեանը հանդիպեց Լեհաստանի Տնտեսութեան փոխնախարար, ԵՄ-ի հետ Լեհաստանի տնտեսական համագործակցութեան պատասխանատու` Մարչին Կորոլեցին: Զրոյցի ընթացքում կողմերն ընդգծեցին հայ-լեհական տնտեսական համագործակցութեան խթանման անհրաժեշտութիւնը եւ միջկառավարական յանձնաժողովի ձեւաչափով այն համակարգելու կարեւորութիւնը: Հայաստանի ԱԳ փոխնախարարը կարեւորեց նշւած ծրագրի շրջանակներում «Խոր եւ համապարփակ ազատ առեւտրի պայմանագրի» շուրջ ընթացող բանակցութիւնները: Դրան ի պատասխան, Լեհաստանի Տնտեսութեան փոխնախարարը առաջարկեց հայկական կողմին Լեհաստանի փորձագիտական աջակցութիւնը փաստաթղթերի մշակման գործում:
Դրական արձագանքելով հայ-լեհական միջկառավարական յանձնաժողովի ստեղծման վերաբերեալ հայկական կողմի առաջարկին, լեհական կողմն առաջարկեց այս տարւայ ընթացքում Երեւանում հրաւիրել յանձնաժողովի անդրանիկ նիստը` նկատի առնելով այն հանգամանքը, որ երկրորդ նիստը կարող է հրաւիրւել 2011 թւականին Վարշաւայում, երբ Լեհաստանը կստանձնի ԵՄ նախագահութիւնը: Նոյն օրը Կարինէ Ղազինեանը Լեհաստանի Սէյմում հանդիպեց Լեհաստանի Սէյմի եւ Սենատի Հայաստանի Ազգային ժողովի հետ պատգամաւորական բարեկամութեան խմբի անդամներին:
Հանդիպման ընթացքում լեհ-հայկական պատգամաւորական խմբի ղեկավար Լուկաշ Աբգարովիչը մանրամասնօրէն ներկայացրեց անցած ժամանակաշրջանում խմբի կատարած աշխատանքները` կարեւորելով Հայաստանի խորհրդարանի հայ-լեհական պատգամաւորական խմբի հրաւէրով մօտ ապագայում Հայաստան կատարելիք այցի նշանակութիւնը: Կողմերն ընդգծեցին միջազգային կազմակերպութիւնների խորհրդարանական վեհաժողովներում Հայաստանի եւ Լեհաստանի պատւիրակութիւնների միջեւ համագործակցութեան սերտացման կարեւորութիւնը:
Փոխնախարար Ղազինեանը պատասխանեց լեհ պատգամաւորների հարցերին` պարզաբանելով Հայ-թրքական յարաբերութիւններին, Ղարաբաղեան խնդրի խաղաղ կարգաւորմանը, Հարաւային Կովկասում տարածաշրջանային անվտանգութեան ապահովմանը վերաբերող խնդիրներ: Պատգամաւորական խմբի անդամները գոհունակութեամբ նշեցին, որ Լեհաստանի վարչապետ Դոնալդ Տուսկի 2010թ. Հայաստան կատարելիք այցը լուրջ խթան կը հանդիսանայ երկկողմ յարաբերութիւնների հետագայ զարգացման, լեհ եւ հայ ժողովուրդների բարեկամութեան ամրապնդման համար: Լեհաստանի Սէյմում տեղի ունեցաւ նաեւ հանդիպում ԵՄ Արեւելեան գործընկերութեան հարցերով մշտական յանձնաժողովի ղեկավար Տոմաշ Լենզի հետ:
Զրոյցի ընթացքում կողմերը մանրամասնօրէն քննարկեցին ԱԳ ծրագրի իրականացմանն առնչւող հարցեր:
«Ա+1»
Posts
0 Պատգամ:
Post a Comment