Ղարաբաղի դէմ պատերազմական գործողութիւններ սկսելու Ալիևի ծրագիրը կանխել է Անկարա՞ն
10:09 • 04.05.10
Ադրբեջանի նախագահ Իլհամ Ալիևը Հայ-թրքական արձանագրութիւնների ստորագրումից առաջ ծրագրում էր ռազմական գործողութիւններ սկսել Լեռնային Ղարաբաղի դէմ, որը, սակայն, վերջին պահին կանխել է Թուրքիայի Ազգային հետախուզական կազմակերպութիւնը (MIT)։ Այս մասին գրում է թրքական Hurriyet օրաթերթը` վկայակոչելով ադրբեջանական Yeni Musavat թերթում տեղ գտած հրապարակումը:
«Ադրբեջանի նախագահ Իլհամ Ալիևի կողմից Լեռնային Ղարաբաղի դէմ ռազմական գործողութիւններ սկսելու ծրագիրը վերջին պահին կանխել է MIT-ը։ Թուրքիայի Ազգային հետախուզական կազմակերպութեան միջամտութիւնը Ալիևի ծրագրերին տեղի է ունեցել մօտ մէկ տարի առաջ: Եւ ուշագրաւ է այն հանգամանքը, որ դա տեղի է ունեցել Շւէյցարիայում Հայաստանի և Թուրքիայի միջև արձանագրութիւնների ստորագրումից առաջ: Թուրքիան, կանխելով Ադրբեջանի ծրագրերը, կասեցրեց նաև Հայաստանի հետ սկսւած գործընթացի ձախողումն ու իր հեղինակութեան խաթարումը: Բաքւի և Անկարայի յարաբերութիւններում առկայ լարւածութեան էութիւնն ու գաղտնիքը կապւած է հէնց այդ հարցի հետ: Եթէ Ադրբեջանն այդ ժամանակաշրջանում ռազմական գործողութիւն սկսէր, «Արդարութիւն և զարգացում» իշխող կուսակցութեան` Հայաստանի հետ յարաբերութիւնների կարգաւորման նախաձեռնութիւնն ամբողջութեամբ կը ձախողւէր»,- գրում է Yeni Musavat-ը «MIT-ը վերջին պահին կանխեց Իլհամ Ալիևի պատերազմը» խորագրով հրապարակման մէջ:Իր հերթին Hurriyet օրաթերթը, վկայակոչելով MIT-ում իր աղբիւրները, գրում է, որ ներկայ փուլում Թուրքիայի Ազգային հետախուզական կազմակերպութիւնը պաշտօնական յայտարարութեամբ հանդէս չի գայ ադրբեջանական պարբերականի պնդումների առնչութեամբ, և հնարաւոր չի լինի պարզել թերթի հրապարակման իսկութիւնը: Իսկ Թուրքիայի արտգործնախարարութիւնը հարցի առնչութեամբ յայտարարել է. «Մենք կողմ ենք խնդիրները երկխօսութեան միջոցով կարգաւորելուն»:
Yeni Musavat թերթը գրում է նաև, որ Թուրքիան այսօր էլ «կը կանգնեցնի» Ադրբեջանին, եթէ վերջինը ցանկանայ խնդիրը լուծել ռազմական ճանապարհով:
Tert.am
Posts
0 Պատգամ:
Post a Comment