ՏՐԱՄԱԳԻԾ

Դարձեալ աշնանամուտ է, եւ վերջին տասնամեակների սովորութեան համաձայն՝ շատերն ու մանաւանդ մարզիկներն ու մարզասէրները պատրաստւում են մասնակցելու կամ ներկայ գտնւելու Հ.Մ.Ա.Կ.-ի տարեկան մարզական փառատօնին՝ Համահայկական խաղերին:

46-ամեայ այս մարզական փառատօնը արդէն երկու օր անց սկսելու է իր 42–րդ շրջանը՝ Համահայկական մարզական խաղերի իր աւանդական անւանումով: Նկատի ունենալով այն իրողութիւնը, որ Իրանի Իսլամական յեղափոխութեան ու պարտադրւած պատերազմի անցուդարձերի պատճառով՝ մի քանի շրջան տեղի չունեցան այս խաղերը, ուստի եւ այս տարի իրական հաշւարկումներով կազմակերպւում են 42-րդ շրջանի Համահայկական մարզախաղերը:

Համահայկականը այն բացառիկ առիթներից է, որը ի մի է բերում ոչ միայն իրանահայ համայնքների երիտասարդութեանը, այլ երբեմն նաեւ Հայաստանի ու Սփիւռքի միւս գաղթօջախներից, հայերը միմեանց հետ շփւելով ու մտերմանալով՝ համասփիւռ հայկական ջերմ մթնոլորտ են ստեղծում՝ հէնց Հայ մշակութային «Արարատ» կազմակերպութեան յարկի տակ:

Համահայկական մարզական խաղերը առաջին անգամ տեղի ունեցան 1964 թւականին եւ մի քանի տարի պարտադրական դադարից բացի՝ կազմակերպւել են ամէն տարի: 1977 թւականից յետոյ, երբ խաղերը նւիրւեցին «Արարատ»-ի լեռնագնաց ու սկաուտ հանգուցեալ Ֆելիքս Մնացականեանին, գեղեցիկ սովորութիւն դարձաւ, որ իւրաքանչիւր շրջան նւիրւի այնպիսի անձանց կամ դէպքերի, որոնք ինչ-որ կերպ դերակատարութիւն են ունեցել համայնքի կամ կազմակերպութեան բարգաւաճմանն ու վերելքին:

Այս տարի 42-րդ շրջանի Համահայկական խաղերը Կազմակերպիչ յանձնախմբի որոշմամբ կոչւում են «ՀԱՅ ՄԱՐԶՈՒՀԻ», եւ դրանք նւիրւում են այն բոլոր մարզուհիներին, որոնք 66 տարիների ընթացքում իրենց ներգործօն դերակատարութեամբ, նպաստել են կազմակերպութեան կամ համայնքի վերելքին:Ու դա պատահական չէ:

Հայուհին ոչ միայն անհերքելի դերակատարութիւն է ունեցել մեր ժողովրդի պատմութեան մէջ, այլ նորագոյն պատմութեան շրջանում եւս, համայնքներն ու մանաւանդ իրանահայ համայնքը անմասն չեն մնացել հայուհու ներդրած կարողութիւններից: Այդ փաստը աւելի շօշափելի է հասարակական հաւաքականութիւնների եւ այս պարագայում Հայ մշակութային «Արարատ» կազմակերպութեան աշխատանքների շրջագծում:

Իսկ վերջին տարիների ընթացքում քիչ չեն եղել այն հերոսական ու պանծալի ձեռքբերումները, որոնք յարակից աշխատակիցներից բացի՝ միմիայն «Արարատ»-ի աղջկանց բասկետբոլի տքնաջան աշխատանքների արդիւնքներն են:Երեք տարի անընդմէջ «Արարատ»-ի աղջկանց բասկետբոլի խումբը դառնալով երկրի ախոյեան՝ նաեւ յաջողեց դառնալ Իրանի Իսլամական Հանրապետութեան ներկայացուցիչը՝ արեւմտեան Ասիա-ի միջակումբային մրցութիւններում:

Դա մեծ պարծանք է ոչ միայն «Արարատ»-ի, այլ նաեւ իրանահայութեան համար, որոնց օջախներում են հասակ նետել այս հերոս աղջիկները:Ուստի՝ մեծ ակնկալիք չէ, որ 42-րդ շրջանի Համահայկական մարզական խաղերը նւիրւեն հայ մարզուհուն, ու այդպիսով արժեւորւեն ու գնահատւեն թէ՛ ներկայ եւ թէ՛ անցեալ սերունդների մարզուհիներ, գործիչներ, սկաուտներ եւ...., որոնք ինչ-որ կերպ պարծանքի ու հպարտութեան առիթներ են ստեղծել մեր եւ «Արարատ»-ի համար: