ՀՅԴ Արեւելեան Ամերիկայի Յայտարարութիւնը՝ Նախագահ Սարգսեանի Նիւ Եորք Այցելութեան Առիթով
ՆԻՒ ԵՈՐՔ.- «Հոկտեմբեր 3, 2009ին, Հայաստանի նախագահ Սերժ Սարգսեան պիտի ժամանի Նիւ Եորք եւ պիտի տեսակցի տեղի հայկական միութիւնների ներկայացուցիչների հետ, հայ-թրքական յարաբերութիւնների կարգաւորման գործընթացի վերաբերեալ բանակցութիւններ ունենալու նպատակով:
ՀՅԴ Արեւելեան ԱՄՆի Կենտրոնական կոմիտէն եւ քոյր միութիւնները հրաւիրւել են սոյն հանդիպումին:
Տեղին է յստակացնել, թէ Մենք պիտի ներկայ լինենք այս հանդիպումին եւ առիթ պիտի չփախցնենք մեր ընդվզումը արտայայտելու եւ նախագահին փոխանցել, թէ այս արձանագրութիւնները վտանգում են մեր հայրենիքի՝ Հայաստան, Արցախ եւ Սփիւռք, ազգային պատկանելիութիւնը:
Նախագահ Սարգսեանը յայտնում է, թէ կատարում է մի շրջապտոյտ, լսելու գաղթօճախների հայութեան կարծիքն ու տեսակէտները: Ընդհանրապէս, արձանագրութիւնների կարգաւորումն ու մշակումը կատարւելուց առաջ էր, որ այսպիսի լսարանները կազմակերպւեն, եւ ոչ թէ արդէն իսկ բանաձեւումը կատարւելուց յետոյ:
Այսպիսի անտրամաբանական դասաւորումների կողքին, աւելացնենք, որ հայրենի ղեկավարութիւնը փոփոխութեան չպիտի ենթարկի որեւէ արձանագրութիւն: Այս անցուդարձերի լոյսի տակ, ՀՀ նախագահի այցելութիւնը ոչ թէ միայն ուշ է, այլ նաեւ զուրկ է քաղաքական եւ բարոյական անկեղծութիւնից, մանաւանդ որ երկու պետութիւններն էլ՝ Հայաստան եւ Թուրքիա, պաշտօնապէս յայտնել են, թէ արձանագրութիւնների գործընթացը արագացւել են եւ յառաջիկայ երկու շաբաթների ընթացքին, պիտի կատարւեն վերջնական ստորագրութիւնները:
ԱՄՆի Արեւելեան շրջանը նկատում է Հայկական Սփիւռքի ամենահին շրջաններից մէկը, յատկապէս՝ 1915ի Հայոց Ցեղասպանութեան օրերին կազմւած: Այս վերապրողները, շարունակ պահելով իրենց պատկանելիութիւնը՝ բուռն պայքար մղեցին, որպէսզի պատշաճօրէն ճանաչւի այդ Եղեռնը եւ կատարւի հատուցումը: Դժբախտաբար, այսօր մի շարք Սփիւռքեան կազմակերպութիւններ երկդիմի կարծիքներ են աարտայայտում եւ նոյնիսկ շնորհաւորում են այս Հայաստան-Թուրքիա արձանագրութիւնները, մերթ քննադատելով ՀՅ Դաշնակցութեանը, թէ՝ սխալ ընթացքի մէջ է:
Նկատում ենք, թէ այլազան պատճառներով, ոմանք պիտի շարունակեն այս սխալ ընթացքը: ՀՅ Դաշնակցութիւնը, անցեալում կատարել է զիջումներ՝ միշտ թիկունք կանգնելով հայրենիքի ազգային շահերը պաշտպանող քաղաքականութեանը: Սակայն, մի շարք հարցերից չի կարելի տեղի տալ ու զիջել, յատկապէս, երբ առաջնահերթ իրաւունքներն են խնդրոյ առարկան:
Այս միտումով, առանց տատամսումի, ՀՅ Դաշնակցութիւնը մերժում է արձանագրութիւնների մի շարք կէտեր.- Թուրքիայի տարածքային անխախտելիութեան սկզբունքի առանձնապէս համաձայնութիւն տալը համազօր է հողային պահանջատիրութիւնից հրաժարումի ամրագրումի եւ դադրեցնում է ի նպաստ Հայոց Ցեղասպանութեան տարւած որեւէ աշխատանք:- Հայոց Ցեղասպանութեան «անկողմնակալ» եւ «գիտական» հիմքերի վրայ քննարկումը, օգտագործելով պատմական արխիւներ՝ այն տպաւորութիւնն է թողնում, թէ Եղեռնը դեռ չէ ուսումնասիրւել եւ քննարկումի առարկայ են դարձնում Հայոց Ցեղասպանութեան իրողութիւնը:- Հայաստանին՝ թիկունք կանգնելը դրացի երկրների հողային ամբողջականութեան, նշանակում է Արցախի ժողովրդի ինքնավարութիւնը խնդրոյ առարկայ դարձնել:
Մենք չենք կարող համոզւել, թէ մի հայորդի, որ մասնակցել է Ապրիլ 24ի ցոյցերի, կարող խանդավառութեամբ թիկունք կանգնել այս արձանագրութիւններին, այն հայորդին, որ պայքարել է իր նահանգից ներս ի նպաստ Եղեռնի ճանաչման մի յօդւած վաւերացնելու, այն հայորդին, որ արցունք է թափել Եղեռնից վերապրողների սարսափելի յուշերը մտիկ անելով, այն հայորդին, որ նւիրատւութիւններ է կատարել ի նպաստ Արցախի մէջ գործող մանկապարտէզի, կամ յարգել է յիշատակը Հայ Դատի համար զոհւած Հայ մարտիկին:
Հայաստանի հանրապետութիւնը այս որոշումներով ու արձանագրութիւնների ստորագրումով վտանգում է Հայ Դատի գործի համար տարւած աշխատանքն ու գործընթացը, նաեւ փչացնում է տարիների ընթացքին կատարւած հետեւողական աշխատանքը։ Փոխարէնը՝ գոհացնում է ներկայ թուրք ղեկավարութեան փափաքը, որ միշտ լռութեան է մատնել ու ծածկել է Հայկական Հարցը:
Շաբաթ, Հոկտեմբեր 3, 2009ին, ՀՅ Դաշնակցութեան Կենտրոնական կոմիտէն այս յայտարարութիւնն է, փոխանցում նախագահ Սերժ Սարգսեանին: Մենք վստահ ենք, որ յատկապէս ներկայ օրերին, գաղութի անդամները թիկունք պիտի կանգնեն մեր ընթացքին»:
ՀՅԴ ԱՐԵՒԵԼԵԱՆ ԱՄՆ–ի
ԿԵԴՐՈՆԱԿԱՆ ԿՈՄԻՏԷ
Posts
0 Պատգամ:
Post a Comment