ԴԻՏԱՆԿԻՒՆ
Հայաստանի հասարակութիւնը մինչ օրս տեղեկացւած չէ հայ-թրքական արձանագրութիւններում պարունակւող վտանգների մասին
Հոկտեմբերի 23-ին «Քաղաքացիական ազգային նախաձեռնութիւն» հասարակական կազմակերպութիւնը կազմակերպել էր «առանց յղումների» ձեւաչափով սեմինար-քննարկում՝ հայ-թրքական արձանագրութիւններում պարունակւող վտանգաւոր դրոյթների, դրանց մասին հասարակութեան տեղեկացւածութեան եւ այդ արձանագրութիւնների վաւերացման գործընթացը խափանելու հաւանական ուղիների վերաբերեալ:
Քննարկմանը մասնակցում էին տարբեր բուհերի ուսանողներ, ԱԺ-ի փորձագէտներ: Հրաւիրւած քաղաքական ուժերի երիտասարդական թեւերից ներկայ էին ՀՅԴ-ի, Հնչակեան կուսակցութեան եւ «Ժառանգութեան» ներկայացուցիչները:
Քննարկման մասնակցողները գրեթէ միակարծիք էին այն հարցում, թէ արձանագրութիւնները պարունակում են Հայաստանի շահերի տեսանկիւնից անընդունելի նախապայմաններ:
Քննարկւեց նաեւ ընդդիմութեան եւ քաղաքացիական հասարակութեան դերը՝ այս արձանագրութիւնների վաւերացումը խափանելու գործում, եւ այդ ուղղութեամբ նրանց հաւանական գործողութիւնները:
Խօսւեց բոլոր ուժերը կենտրոնացնելու, այս արձանագրութիւններին դէմ հանդէս եկող բոլոր քաղաքական եւ հասարակական ուժերի միաբանման, կուսակցական դրօշակները իջեցնելու եւ մէկ՝ Հայաստանի Հանրապետութեան դրօշի ներքոյ հանդէս գալու անհրաժեշտութեան մասին:
Յատկապէս, կարեւորւեց հասարակութեանը տեղեկացնելու անհրաժեշտութիւնը, քանի որ ակնյայտ է, որ շատերը գտնւում են իշխանական հեռուստաընկերութիւնների միակողմանի քարոզչութեան ազդեցութեան ներքոյ եւ «Ոչ»-ի շարժումն ընկալում են որպէս հայ-թրքական սահմանը բացելուն եւ երկու երկրների միջեւ դիւանագիտական յարաբերութիւնների հաստատման ու դրանով բնականոն յարաբերութիւնների ձեւաւորման դէմ ուղղւած բողոքի միջոցառումներ:
Ներկաները որոշեցին շարունակել տարատեսակ միջոցառումների (պիկետներ, բողոքի ցոյցեր, թռուցիկների տարածում, սեմինար-քննարկումներ եւ այլն) կազմակերպումը՝ ընդդէմ արձանագրութիւնների վաւերացման եւ դրանցում առկայ վտանգների մասին հասարակութեանը տեղեկացնելու ուղղութեամբ:
Posts
0 Պատգամ:
Post a Comment