ՏՐԱՄԱԳԻԾ

Հայրս Թուրքիայի Իզմիր քաղաքի ծնունդ է, Եղեռնի ժամանակ ութ տարեկան հասակում ոտաբոբիկ գնացել է Յունաստան, այնտեղ ապրել երեսուն տարի, այնուհետեւ եկել Հայաստան: Յիսուն տարեկան է եղել, երբ ես ծնւել եմ, եւ իմ ծնունդը ես համարում եմ ճակատագրական: Իմ միակ ցանկութիւնն այն է, որ աշխարհը ճանաչի Ցեղասպանութիւնը, որ բոլորն իմանան` ինչպիսին է թուրքը: Թուրքին նոր չեն ճանաչում, նա միշտ անմեղ է ձեւանում, իր քթի տակ ժպտում եւ միայն խայտառակ գործունեութիւն է ծաւալում:

հացադուլի մասնակիցԱնցած օրերը մեր պայքարի անդրդւելիութիւնն են ապահուել: Ես ոչ թէ որպէս դաշնակցական, այլ պարզապէս որպէս հայ եմ այստեղ: Մեր կորուստների եւ մեր արեան կանչով եմ այստեղ: Անարդարացի է մեր իշխանութիւնների եւ արտաքին գործերի նախարարութեան քաղաքականութիւնը: Անդրկուլիսային պայմանագիր է դա, որը ժողովրդին չի բացայայտում այդ բանակցութիւնների իրական էութիւնը:

Ամէն օր իրենց խօսքը փոխելով` իշխանութիւնները քողարկում են ճշմարտութիւնը ժողովրդից: Այս ամէնը դեռ կը բացայայտւի, բայց վախենում եմ` ուշ լինի: Մեր քաղաքականութիւնը անբարոյական ուղի է բռնել:

Էրդողանը բառացիօրէն շեշտում է, որ սահմանները բացւելու դէպքում Ադրբեջանի տարածքային ամբողջականութիւնը պէտք է պահպանւի, մօռացէ՛ք Ցեղասպանութեան հարցը: Եթէ այս նախապայմանների մասին խօսք չլինի, ես էլ դէմ չեմ լինի սահմանների բացմանը: Մենք ապրում ենք քաղաքակիրթ աշխարհում, որտեղ կարեւոր է հարեւանների հետ լաւ տնտեսական յարաբերութիւնների հաստատումը, բայց այդ տնտեսական յարաբերութիւնները ձեռք բերելու համար չպէտք է մօռանանք մեր արժանապատւութիւնը:

Որպէս Հայ մարդու` ինձ դուր չի գալիս մեր ստորացւած վիճակը: Այսօր վաճառւում են մեր հայրենի հողերը, եւ շատ հարցերում մենք զիջում ենք Թուրքիային ու Ադրբեջանին: Ես այստեղ եմ այդ ամէնի դէմ պայքարելու համար: Վստահ եմ, որ մեր ժողովուրդը թոյլ չի տայ, որ պատմական սխալ թոյլ տրւի: Այս պայքարը միայն դաշնակցականի հոգեբանութեան մէջ չէ, որ պէտք է լինի: Սա ցանկացած հայի պայքար է: Այսօր մենք պարտաւոր ենք լինել ազգային արժէքների պաշտպան եւ պարտաւոր ենք միասնականօրէն պայքարել ազգային խայտառակութիւնը կանխելու համար:

հացադուլի մասնակիցԿոնկրետ ինձ համար սա արժանապատւութեան հարց է: Մենք աչքներս փակ եւ ձեռքներս ծալած նստելու իրաւունք չունենք: Այն, ինչ կարող է կատարւել, կը փոխի մեր ամբողջ ազգի ճակատագիրը: Ոտքի պէտք է կանգնենք, քանի ուշ չէ: Միայն Աստւած գիտէ, թէ ինչեր կը բերի այդ արձանագրութիւնը մեր գլխին իր մութ կէտերով:

Իշխանութիւնները պարտաւոր են մտածել, թէ ինչ են պատասխանելու ապագայ սերնդին: Մենք երեխաներ ունենք, ինչպէ՞ս ենք կարողանալու նայել նրանց աչքերին եւ ասել, որ ոչինչ չենք կարողացել անել, ինչպէ՞ս ենք նրանց հայրենասիրութեան դասեր տալու, եթէ այսօր մենք դա չցուցաբերենք:

Կարեւորում եմ Դաշնակցութեան պայքարը, քանի որ սա բխում է հայ ժողովրդի շահերից: Մեր երկիրը ծախում են թէ ինչ են անում` չեմ հասկանում: Սահմանի բացումն ի վնաս մեզ է: Թուրքը գալու է` մեզ դուրս անի մեր երկրից: Գուցէ մի քանիսին սա օգուտ է, բայց ողջ հայութեանն է վնասելու: Սա դավաճանութիւն է, որը կը վտանգի մեր պետութիւնը եւ կը սեւացնի մեր ազգային դիմագիծը: Մենք պէտք է մի բռունցք դառնանք եւ թոյլ չտանք կորցնել մեր դարաւոր պայքարով վաստակած անկախութիւնը:

Դէմ եմ այս արձանագրութեան ստորագրմանը, որը հակասում է մեր ազգային շահերին: Վստահ կարող եմ ասել, որ Սիրիայի եւ Լիբանանի հայութիւնը նոյնն է կարծում: Անցեալի փորձը մեզ պէտք է ստիպի զգոյշ լինել մեր քաղաքականութեան մէջ: Հայաստանը դեռ պատրաստ չէ նման յարաբերութիւնների: Սփիւռքն անհանգստացած է ոչ միայն Ցեղասպանութեան, այլեւ Արցախի խնդրի համար: Հայաստանյան իշխանութիւններից սփիւռքահայութիւնը մեծ հիասթափութիւն կապրի, եթէ այդ նախապայմաններով բացւեն սահմանները: