Հայկական Գէոպոլիսը (Աշխարհի քաղաք) ՝ «Շանգհայ Էքսպօ-2010»-ում
19:05 / 30.04.2010
«Շանգհայ Էքսպ-2010» միջազգային ցուցահանդէսում Հայաստանը ներկայացրել է Գէոպոլիսի (Աշխարհի քաղաք) մակետը:
Հայաստանի մասնակցութեան գլխաւոր յանձնակատար, ՀՀ էկոնոմիկայի նախարար Ներսէս Երիցեանն ու ՀՀ վարչապետի օգնական Ռուբէն Շատվորեանը ցուցահանդէսում բացել են Հայաստանի տաղաւարը՝ քննարկման ներկայացնելով մարդկութեան պատմութեան մէջ առաջին անգամ համատեղ ուժերով Արարատ լեռան փեշին Գէոպոլիս (Աշխարհի Քաղաք) կառուցելու առաջարկը:Ցուցահանդէսում արդէն կարելի է տեսնել նաեւ քաղաքի վիրտուալ 3D մակետը Experiencing տաղաւարում, որը Շանգհայ օնլայն համակարգում ընտրել է Հայաստանը: Կազմակերպիչների տեղեկացմամբ` օնլայն համակարգը համաշխարհային ցուցահանդէսների պատմութեան մէջ առաջին անգամ ամենալայն տարածումը կը գտնի հէնց «Շանգհայ Էքսպօ 2010»-ի շրջանակներում, եւ Հայաստանը այն սակաւաթիւ երկրներից մէկն է, որը յաջողութեամբ իրականացրել է տւեալ համակարգի ամենաբարդ նախագծերից մէկը:
Բաւական հետաքրքիր է պատրաստւած նաեւ հայկական տաղաւարը: Հէնց մուտքի մօտ տեղակայւած է կոմերցիոն հատւած, որտեղ այցելուները կը կարողանան ձեռք բերել տարբեր ապրանքներ, ինչպէս նաեւ` համտեսել հայկական հողի բարիքները, յատկապէս՝ հայկական ծիրանը, կը ծանօթանան Հայ ոսկերիչների վարպետութեանը:
Նշենք, որ սեպտեմբերի 21-ին նախատեսւած է Հայաստանի ազգային օրւայ տօնակատարութիւնը, որի շրջանակներում կը ներկայացւի հայկական մշակոյթը, կայանալու են բազմաթիւ մշակութային իրադարձութիւններ` ցուցահանդէսներ, բեմականացումներ եւ այլն:
Նշենք, որ «Շանգհայ Էքսպօ-2010» ցուցահանդէսին մասնակցում է նաեւ Հայաստանի նախագահ Սերժ Սարգսեանը, որին Չինաստան է հրաւիրել ՉԺՀ ղեկավար Հու Ձինթաոն: Հեղինակաւոր ցուցահանդէսին մասնակցում են աշխարհի 192 երկրներ:
NEWS.am
Posts
0 Պատգամ:
Post a Comment