Թուրքիայի խորհրդարանի յանձնաժողովի նախագահը եւս միացել է պատասխանատւութիւնից խուսափելու արշաւին
18:43 / 21.01.2010
Հայաստանի Սահմանադրական դատարանի որոշումը՝ կապւած Ցիւրիխում ստորագրւած հայ-թրքական յարաբերութիւնները կարգաւորող արձանագրութիւնների հետ, հանգիստ չի տալիս թուրքական իշխանութիւններին։
Թուրքիայի արտգործնախարարութեան եւ վարչապետի յայտարարութիւնից յետոյ այս հարցին է անդրադարձել թուրքական խորհրդարանի արտաքին յարաբերութիւնների յանձնաժողովի նախագահ Մուրադ Մերջանը, ով օրեր առաջ յայտարարել էր, որ առանց Ղարաբաղի խնդրի լուծման՝ ինքը արձանագրութիւնները չի դնի քւէարկութեան, քանի որ միանշանակ կմերժւեն։Թուրքական Haberaktuel կայքէջի փոխանցմամբ՝ Մերջանը յայտարարել է, որ Հայաստանի Սահմանադրական դատարանի որոշումը հակասում է արձանագրութիւնների ոգուն, վնասում է գործընթացին, եւ կոչ է արել ՀՀ արտգործնախարարին՝ խնդրի վերաբերեալ պարզաբանումներ տալ եւ ցուցաբերել անհրաժեշտ քաղաքական կամք։
«Հայաստանի Սահմանադրական դատարանի կայացրած որոշումը անհրաժեշտ է քննարկել միջազգային իրաւունքի շրջանակներում։ Թուրքիայի արտգործնախարարութեան իրաւաբանների կողմից իրականացւող աշխատանքներից յետոյ՝ որոշում կը կայացւի»,-նշել է Մերջանը։
Թուրքիայի խորհրդարանից արձանագրութիւնները յետ կանչելու խնդրի հետ կապւած լրագրողի հարցին, Մուրադ Մերջանը նկատել է, որ դրա կարիքը չկայ, քանի որ ոչ մի տարբերութիւն չկայ դրանք խորհրդարանում են թէ յետ կը կանչւեն։
Լուրեր Հայաստանից
Posts
0 Պատգամ:
Post a Comment