Արծւիկ Մինասեան.– Ճգնաժամի յաղթահարումը տեղի կունենայ 2012-ի կէսերին կամ նոյնիսկ աւարտին
17:34 / 01.01.2010
«2009 թւականի տնտեսական տարին աչքի ընկաւ կառավարութեան կողմից ներկայացւած կանխատեսումների չիրականացմամբ, այդ թւում նաեւ այն պնդումը, թէ միջազգային ճգնաժամի ազդեցութիւնը մեծ չի լինի Հայաստանում»,- NEWS.am-ի թղթակցի հետ զրոյցում նման տեսակէտ յայտնեց ՀՅԴ խմբակցութեան պատգամաւոր, տնտեսագէտ Արծւիկ Մինասեանը:
Նրա խօսքով, 2009 թւականի ձեռքբերումներից կարելի է համարել այն, որ մի փոքր աւելի սթափ դարձաւ մեր հասարակութիւնը, այդ թւում նաեւ կառավարութեան կողմից ներկայացւող քաղաքականութեան վերաբերեալ եւ արդէն հասկանալի դարձաւ, որ ամէն ինչ այդքան էլ այնպէս չէ, ինչպէս ներկայացնում են իշխանութիւնները:«Ինչ վերաբերում է 2010 թւականի համար կանխատեսումներին, ես կը դժւարանամ յստակ բան ասել: Միայն նշեմ, որ ճգնաժամի յաղթահարումը աւելի կը հետաձգւի, քան կանխատեսում են Հայաստանի իշխանութիւնները: Այլ կերպ ասած՝ դա տեղի կունենայ 2012 թւականի կէսերին կամ նոյնիսկ աւարտին: Կարծում եմ, որ 2010 թւականին տնտեսական անկումը կշարունակւի»,- նշեց պատգամաւորը:
Հարցին, թէ ինչպիսի՞ն էր ՀՀ արտաքին քաղաքականութիւնը 2009 թւականին, եւ որոնք էին ձեռքբերումներն ու ձախողումները, Ա. Մինասեանն արձագանքեց միայն ձախողումների մասով, քանի որ 2009-ին ձեռքբերում արտաքին քաղաքականութեան մէջ նա չի տեսնում: «Ամենամեծ ձախողումը Հայ-թուրքական յարաբերութիւններում զարգացումներն էին, որոնք յանգեցրեցին սեղանին դրւած արձանագրութիւններին: Իշխանութիւնները փաստօրէն շեղւել են յայտարարւած արտաքին քաղաքականութեան ուղենիշներից եւ ներքին քաղաքականութեան ուղենիշներից եւս»,- ասաց նա ու յաւելեց. «Մենք պէտք է ձգտենք, որ Հայաստանի նախաձեռնողական քաղաքականութիւնը լինի առաջին հերթին ներքին կեանքում՝ ազգաբնակչութեան կենսապայմանների բարելաւման ուղղութեամբ, իսկ արտաքին յարաբերութիւններում լինենք աւելի կշռադատւած եւ աւելի ճիշտ հաշւարկներ կատարենք: Սա ըստ էութեան ցանկութիւն է, ոչ թէ կանխատեսում, իսկ կանխատեսում անել դժւարանում եմ»:
Լուրեր Հայաստանից
Posts
0 Պատգամ:
Post a Comment