ՏՐԱՄԱԳԻԾ

Ի գիտութիւն ձեզ.
Չբացայայտւած իւրաքանչիւր յանցագործութիւն ծնում է մի քանի ոճիր, չպատժւած իւրաքանչիւր յանցագործ հայրանում է մի քանի ոճրագործի: Յիշէ°ք այն բարձրաստիճան պաշտօնեաներին, ովքեր դեռ 1990-ականների սկզբից, նպաստելով ընտրութիւնների կեղծմանը, մարդկանց իրաւունքների բռնացմանը, անկախ դատարան հասկացութեան յուղարկաւորմանը` հետագայում հէնց իրենք ուղղակի կամ անուղղակի զոհերը դարձան իրենց իսկ ստեղծած անմարդկային, յանցածին համակարգին... Լաւ յիշէք:
Ասում էք` ՙՄարտի 1-ի էջը փակւած է՚, ՙԱմէն մարդ իր արարքների համար է պատասխանատու՚, ՙԻ տխրութիւն զոհերի հարազատների և ընդդիմադիրների` մարտի 1-ի էջը փակւած է՚... Որքան հեշտ էք արտասանում այդ խօսքերը, ինչքան հանգիստ ու անխռով: Նաև այդպէս եք ցոյց տալիս, որ ծնողներիս ՑԱՒՆ ՈՒ ՎԻՇՏԸ ձերը չեն, օտար են, ՙբեռ՚ են ձեզ համար... ՙԶեկոյցներ՚ էք պատրաստում, Եւրոպայում ինչ-որ իրաւական հիմնաւորումներ ներկայացնում... Ձեր այդ վերաբերմունքին մէկ ու ճշմարիտ գնահատական կայ` փորձում էք կոծկել յանցագործութիւնը, պարտակել` մեղաւորներին, նշանառու ոստիկաններին, իշխանութեան հաւատարիմ մարդասպաններին:

Դրանով էք ՄԵՂՍԱԿԻՑԸ դառնում ոճրագործութեան, դրանով և` ձեր վախով, անտարբերութեամբ, անսրտութեամբ...
Հրամայել էր` 20 օր արտակարգ դրութիւն. որ` ի՞նչ, քրիստոնեա զաւակներիս արի՞ւնը մարսէին... Այցելեց միայն մէկ զոհի հարազատներին` ցաւակցութեան. իսկ մեր որդիները զոհե՞ր չէին, մեր լացն ու ողբը ծնողակա՞ն չէր:
Պետութիւնը դարձրել էք գանձարան` դանայան տակառի պէս ձեր անկուշտ ընչաքաղցութեան համար, երկիրը` մահկանացուներիս կեանքի կազինօ ու խորովածանոց, ժողովրդին համարում էք լոկ ձեր ստնտուն, իրաւապահ համակարգն էլ օգտագործում էք որպէս վահան ու մահակ...
Շատ խօսք ունենք ասելու` ծնողի, մարդու, հայի, քաղաքացու... Ու դեռ` կասենք: Բայց հիմա Նոր տարի է, մեզ համար` հին 2008...: Ձեր ապագայ արու թոռնիկներին` բարի ծնունդ, բարի ծառայութիւն Հայոց բանակում, և թող նրանք ապրեն իրաւական-քաղաքացիական Հայաստանում, որպէսզի այդ երիտասարդ զինծառայողների վերադասները նրանց ապօրինաբար չտեղափոխեն մայրաքաղաքի փողոցներ` ՀԱՅՐԵՆԻՔԻՆ ԾԱՌԱՅԵԼՈՒ սուրբ երդումը ՙի կատար ածելու՚ հայրենակիցների դէմ: Ամանորին` մեր պետութեանը մաղթում ենք - օրէնք, իրաւունք, արդարուիւն":
Մարտի 1-ի որդեկորոյս ծնողներ`
Զոհւած զինւոր Տիգրան Աբգարեանի մայր` Ռուզաննա ՅարութիւնեանԶոհւած Տիգրան Խաչատրեանի մայր` Ալլա ՅովհաննիսեանԶոհւած Գոռ Քլոյեանի հայր` Սարգիս ՔլոյեանԶոհւած Արմէն Ֆարմանեանի հայր` Վաչագան ՖարմանեանԶոհւած Դաւիթ Պետրոսեանի մայր` Ջեմմա ՎարդումեանԶոհւած Յովհաննէս Յովհաննիսեանի այրի` Լիլիա ՄինասեանԶոհւած Սամւէլ Յարութիւնեանի հայր` Ռուբէն Յարութիւնեան