Star.- «Եթէ Հիտլերը թուրք լինէր՝ հրէաների Հոլոքոստն էլ կը հերքէինք»
Մեր մէջ խօսելիս կարող ենք իթթիհադականներին (Հայոց Ցեղասպանութիւնը իրականացրած երիտթուրքերին) քննադատել, սակայն մեր մօտ գերակայ է „կեղտոտ լւացքը տնից դուրս չեն հանում“ սկզբունքը։
15:45 / 15.03.2010Թուրքական Star-ի թղթակից Էրգուն Բաբահանը իր հրապարակման մէջ անդրադարձել է վերջին շրջանում Թուրքիայի իշխանութիւնների պահւածքին՝ կապւած ԱՄՆ-ում եւ Շւէդիայում Հայոց Ցեղասպանութեան նախագծերի հետ եւ հեգնել թուրքական յետադիմականութիւնն ու մերժողականութիւնը։
«Այդ որոշումներից յետոյ Թուրքիայի իշխանութիւնները շատ զայրացան եւ Վաշինգտոնի ու Ստոկհոլմի դեսպանները յետ կանչւեցին։ Չեղեալ յայտարարւեցին այդ երկրներ կատարելիք այցերը։ Այս արձագանքները, սակայն, ուղղւած են միայն Հայկական օրինագիծը նոր ընդունած երկրների դէմ, իսկ նախկինում ընդունած երկրների դէմ ոչ մի արձագանք չկայ։ Աւելի վաղ ցեղասպանութիւնն ընդունած երկրներում թուրք դեսպանները տեղում են։ Գուցէ իշխանութիւնը որոշում է կայացրել, որ 2010-ից յետոյ չայցելել եւ դեսպաններ չունենալ այն երկրներում, որտեղ կընդունւի Ցեղասպանութիւնը ճանաչող օրինագծե՞ր։
Թուրքիայում գերիշխում է այն տեսակէտը, որ Էնվէր փաշան կարող էր յեղաշրջում անել, Օսմանեան կայսութեան վերջը բերել, 90 հազար երիտասարդի սառեցնելով մահւան դատապարտել, բայց ցեղասպանութիւն չէր կարող անել։ Մեր մէջ խօսելիս կարող ենք իթթիհադականներին (Հայոց Ցեղասպանութիւնը իրականացրած երիտթուրքերին) քննադատել, սակայն մեր մօտ գերակայ է „կեղտոտ լւացքը տնից դուրս չեն հանում“ սկզբունքը։
Տեսէք, նոյնիսկ Թուրքիայի արդիւնաբերողների եւ գործարարների միութիւնն (TÜSİAD) է ազգայնամէտ դարձել (Յիշեալ կազմակերպութիւնը չեղեալ յայտարարեց ԱՄՆ կատարելիք այցը):
Այո’, պաշտպանէք զարգացած եւ ամենաանկախ քաղաքականութիւնը եւ ներկայացրէք շովինիստական քաղաքականութիւն։ Նշանակում է, որ դուք էլ գաղտնի իթթիհադական էք, կամ էլ ձեր կապիտալի ստեղծման հիմքում իթթիհադականների բաժինը մեծ է։ Եթէ իթթիհադականները ազգային փոքրամասնութիւններին չճնշեին, չկոտորէին՝ ձեր պապերը չէին կարող նստել նրանց ունեցւածքի վրայ եւ կապիտալ կուտակել։
Կարճ ասած, ձեր պատմութեանը տէր էք կանգնում։ Դէ ամերիկացիներն էլ կարմրամորթներին են սպանել, այնպէս չէ՞։ Բայց նրանք դա ընդունել են եւ դասագրքերում ներկայացնում են։
Թէ՞ հայ մանկահասակ երեխաներին ռուսների հետ միանալու եւ Օսմանեան կայսրութեան դէմ պատերազմելու համար տեղահանեցին, իսկ մայրերին էլ՝ երեխաների զէնքը ապահովելու համար։ Թէ՞ Օսմանեան դինաստիան դաւաճան կարող է լինել, թշնամու հետ կարող է համագործակցել, բայց նրա ղեկավարութիւնը ցեղասպանութիւն չի կարող անել։
Եթէ Հիտլերը թուրք լինէր՝ հրէաների հոլոքոստն էլ կը հերքէինք։
„Ալլահ, Ալլահ“ գոռացող բանակի կողմից պլանաւորւած մզկիթ պայթեցնելը կընդունենք, նոյն բանակի կողմից երկրի բնակչութեան զանգւածային ոչնչացմանը չե՞նք հաւատայ։
Պարոն վարչապետ, մէկ անգամ եւս տեղահանութեան որոշումները տեսէք։ Այդ ինչպէ՞ս եղաւ, որ իրականում մինչեւ 1,5 միլիոն հայերի թիւը, որոնք վաղուց ապրում էին այս հողերում, այդքան կրճատւեց։ Իմ կարծիքով, ապրիլի 24-ին բոլորը պէտք է փողոց դուրս գան հետեւեալ կարգախօսով. „Բոլորս Էնվէր ենք, բոլորս իթթիհադական ենք“:
Hurriyet-ի նախկին խմբագիրն էլ դրօշակներով միտինգներում շատ ակտիւ է եւ „Բոլորս Էնվէր ենք“ միտինգը յաջողութեամբ կանցկացնի։ Իմ կարծիքով այդ կարգախօսով պաստառները նոյնիսկ 5 լումայով կտան։ Դէ, ազգայնականներ դէպի փողոց…»,-աւարտում է իր հրապարակումը Էրգուն Բաբահանը։
Լուրեր Հայաստանից
Posts
0 Պատգամ:
Post a Comment