Արամ Սաֆարեան.– Ադրբեջանական կողմը զզւեցրել է եւրոպացի պատգամաւորներին
16:19 / 01.03.2010
«ԵԱՀԿ Խորհրդարանական վեհաժողովի՝ փետրւարի 17-ից 20-ը Վիէննայում կայացած ձմեռային նստաշրջանում մենք առիթ ենք ունեցել բանավէճի մէջ մտնել ադրբեջանական պատւիրակութեան հետ»,- մարտի 1-ին տեղի ունեցած մամուլի ասուլիսում յայտարարեց ԵԱՀԿ ԽՎ-ում Հայաստանի պատւիրակութեան ղեկավար, ԱԺ պատգամաւոր Արամ Սաֆարեանը։
Նշելով, որ բանավէճի պատճառն ադրբեջանական կողմի այն դիտարկումն էր, թէ իբր ԼՂ առաջիկայ խորհրդարանական ընտրութիւններն անօրինական են եւ հակասում են միջազգային իրաւունքին, նա տեղեկացրեց, որ հայկական կողմն ի պատասխան հրաւիրել է գործընթացով հետաքրքրւող ԵԱՀԿ ԽՎ-ի իւրաքանչիւր պատգամաւորի՝ ներկայ գտնւել մայիսի 23-ին Լեռնային Ղարաբաղում կայանալիք խորհրդարանական ընտրութիւններին։ԵԱՀԿ ԽՎ-ում Հայաստանի պատւիրակութեան ղեկավար Արամ Սաֆարեանը տեղեկացրեց նաեւ, որ ձմեռային նստաշրջանի ընթացքում հայկական պատւիրակութիւնն իր դիրքորոշումն է արտայայտել աֆղանական հարցի առնչութեամբ, մասնակցել է ԵԱՀԿ ԽՎ-ում Ռուսաստանի պատւիրակութեան կողմից կազմակերպւած մի «կլոր սեղանի», որը քննարկել է ազգատեացութեան եւ ազգամիջեան թշնամանքի կանխարգելմանն առնչւող հարցեր։«Ձմեռային նստաշրջանի ընթացքում մենք հանդիպումներ ենք ունեցել նաեւ մի շարք երկրների՝ Յունաստանի, Կանադայի, Գերմանիայի, Հոլանդիայի, Ռուսաստանի, Ղազախստանի եւ Բելառուսի պատգամաւորների հետ եւ նրանց հետ քննարկել Ղարաբաղեան հարցի կարգաւորման արդի գործընթացին վերաբերող հարցեր»,- նշեց Ա. Սաֆարեանը՝ աւելացնելով, որ յատկապէս վերջին ամիսների ընթացքում ադրբեջանական քարոզչութիւնը բազմապատկել է Հայաստանին սեւացնելու եւ նրան որպէս «ագրէսօր» ներկայացնելու ջանքերը. «Այս ուղղութեամբ Ադրբեջանը ֆինանսական եւ մարդկային հսկայական միջոցներ է ծախսում. այստեղից հետեւութիւն, որ այդ երկիրը պատրաստ չէ փոխհամագործակցութեան»,- նկատեց նա՝ յաւելելով, որ ըստ իր ունեցած հաւաստի տեղեկութիւնների՝ ադրբեջանական կողմն իր միօրինակ յայտարարութիւններով զզւեցրել է եւրոպացի պատգամաւորներին։
Ասուլիսի միւս բանախօս, ԵԱՀԿ ԽՎ-ում Հայաստանի պատւիրակութեան անդամ Խաչիկ Յարութիւնեանը, իր հերթին հաստատելով ադրբեջանական կողմի՝ Հայաստանի վրայ անընդհատ «ստւեր գցելու» քաղաքականութիւնը, տեղեկացրեց, որ ԵԱՀԿ՝ Օսլոյում կայանալիք ամառային նստաշրջանի ընթացքում կը ներկայացւի մի բանաձեւի նախագիծ, որը ենթադրում է հակամարտութեան մասնակից երկրների՝ ուժի չկիրառման սկզբունքը։
«Նախատեսւում է նաեւ Խորհրդարանական վեհաժողովի նախագահ Ժոաօ Սուարեշի զեկոյցը Ղարաբաղեան հակամարտութեան վերաբերեալ, ով պատրաստւում է մարտի 10-ից 13-ը տարածաշրջանային այց կատարել»,- ամփոփեց նա։
Լուրեր Հայաստանից
Posts
0 Պատգամ:
Post a Comment